Голосник

Сумар дня на 30. липця/юлия 2020 р.

Приносиме вам сумар медияльной ґрупы ЛЕМ.фм+ на ден 30. липця/юлия 2020 р.


40. Лемківска Ватра на Чужыні закрыта

Як поінформувал нас ведучый Стоваришыня Лемків Андрий Копча, тогорічна ювілейна, 40. Лемківска Ватра на Чужыні одбуде ся, але на жаль з причыны тырваючой пандеміі буде закрыта для участників. Ватра пройде в суботу, 12. вересня/септембра. Ціліст імпрезы буде трансмітувана в інтернеті. На ватряным поли будут мочы быти лем орґанізаторы, обслуга сцены і пару запрошеных офіцияльных гости, якы традицийно з делеґацийом Лемків зложат квітя при памятнику жертв Акциі Вісла. Пак проходити будут концерты запрошеных ансамблів, переданя Нагороды ім. Никыфора, презентация лемкознавчых выдавництв, як і дальшы товаришучы акциі. Про деталі звязаны з прямым переносом онляйн будеме іщы інформувати.


Другій етап модернізациі лабівского цмонтеря

Влони прошол першый етап модернізациі старого лемківского цмонтеря в Лабовій при Санчы. Як сме подавали, ремонт был зарахуваный до успішных, хоц не повело ся зробити вшыткого, што орґанізаторы заплянували. Причыном было головно невеликє фінансове спертя. Ґрупа вольонтерів не мала підпоры з самоуряду ци державы, а лем даткы од люди. Подібні як при першым етапі, тепер зачала ся колекта на портали www.zrzutka.pl. Орґанізаторы хтіли бы зобрати тым разом 5 тис. зл. Табір є заплянуваный од 31. серпня/авґуста до 5. вересня/септембра. Окрем фінансовой підпоры, ґрупа фурт глядат вольонтерів, котры підтримали бы тоту цінну ініциятиву. В рамках першого етапу повело ся оновити пят памятників, а дальшы штырі были зачати. Акцию сперат ЛАПіТ Кычера, Стоваришыня Маґурич, Стоваришыня Лемків і Музей Лемківской Культуры в Зындрановій. Роботы буде вюл Шымон Моджеєвскій зо Стоваришыня Маґурич. Орґанізаторы ґарантуют кватерунок, іджыня і зворот коштів доізду на Лемковину. Лабівскій цмонтір належыт до найстаршых на Лемковині. Довоєнна Лабова была єдным з найбогатшых і найбільшых лемківскых сел в тій части Лемковины, зато памятникы на цмонтери так само належат до єдных з найкрасшых в реґіоні.


«Деревяна Лемковина»

Мило нам поінформувати, што в днях од 31. липця/юлия до 26. серпня/авґуста в Ґалериі Штукы Двір Карвациянів в Ґорлицях обзерати буде мож выставу архівных фотоґрафій авторства Єжы Тура і Барбары Тондос. Выстава має наголовок «Деревяна Лемковина». Вказує она лем фалаток документациі Тура і Тондос. Фотоґрафікы, котры професийно были істориками штукы, косерваторами і інвентаризаторами, активно діяли для захованя традицийного культурового краєвиду полудньово-східньой Польщы, в тым Лемковины. Більше як піл столітя документували обєкты архітектуры, котры часто попадали в руіну, або доцяп счезали з памяти. При Стоваришыню «Руска Бурса» в Ґорлицях находит ся великій архів фотоґрафій і документациі авторства Єжы Тура і Барбары Тондос. Невелика його част є доступна в здіґіталізуваній формі на сайті www.lem.fm в карті Тур Тондос. Просиме на выставу, але тіж до нашого діґітального архіву.

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі