Сумар дня на 30. липця/юлия 2021 р.

Приносиме вам сумар медияльной ґрупы ЛЕМ.фм+ на ден 30. липця/юлия 2021 р.

Буковы Лісы Бєщадского Нацийонального Парку на списку UNESCO

Як подали в минулу середу пресовы службы Комітету Світовой Спадковины, бєщадскы буковы лісы в польскій части Карпат нашли ся на списку Світовой Природничой Спадковины UNESCO. Буковы лісы, што находят ся на обшыри Бєщадского Нацийонального Парку, вошли в склад европейского обєкту «Стары буковых лісы і буковы пралісы Карпат і інчых реґіонів Европы». Творят го 94 обшыри в 18 державах. Буковы резерваты з Бєщадского Нацийонального Парку чыслят близко 3300 га. В оціні природників, буковы лісы в Карпатах сут приміром захованого в ненарушеным стані лісового комплексу середньой стрефы і єдночасно найбарже комплетного еколоґічного систему европейскых буковых лісів. Єст то тіж безцінный резервуар ґенетичного материялу не лем буків, але і інчых ґатунків звязаных з того типу лісовым сідлиском.

Высова пахняча зільом 2021

В вікенд 21. і 22. серпня/авґуста в Здройовым Парку в Высовій одбуде ся пікнік «Высова пахняча зільом 2021». В проґрамі м.ін. конкурс на плетіня вінків з зіля, забавы для діти, прелекция про лікуючы властивости зіля і чысленны музичны выступы. В неділю, 22. серпня/авґуста, о 19.00 год. буде мож в рамках подіі слухати гры вызначного гушляря лемківского походжыня Мариюша Мончака, якій выступит з Адамом Міхаляком (спів) і Робертом Адамчаком (фортепіян) в проґрамі пн. «Цілую твою руку Мадам… Найкрасшы пісні о женах з мюзікалів, фільмів і опереток». Пікнік буде проходил в суботу од 10.00 годины, а в неділю од 9.00, єдного і другого дня буде ся кінчыл тырваючом до пілночы музичном забавом. Орґанізаторами подіі сут Ґміна Устя Рускє і Ґмінный Осередок Культуры в Устю Рускым.

Кєрмеш Еколоґічного Ідла в Бобовій

Заран в Бобовій одбуде ся Кєрмеш Еколоґічного Ідла і Ремесла. Такы кєрмешы будут там одтепер проходити в кажду послідню суботу місяця аж до кінця жолтня/октобра. В год. од 8.00 до 11.00 на Вельофункцийным Містным Пляци в Бобовій жытелі будут мочы купити еколоґічны продукты безпосередньо од продуцента, приватной особы або рільника. Додатково буде можливіст купити традицийны ремесельны выробы. За бургомайстром Бобовой, Вацлавом Ліґензом – хотят, жебы містный пляц остал екоторгом лем з продуктами з придомашніх ґаздівок. Мают надію притягнути здоровым і добрым ідлом не лем жытелів Бобовой, але і околиц.

Тыжден Позитивных Ініциятив в Ґорлицях

В понедільок, 2. серпня/авґуста, рушат в Ґорлицях акция пн. «Тыжден Позитивных Ініциятив». Як бесідуют орґанізаторы, члены Стоваришыня Понад Ограничынями, буде то час гепенінґів і подій, якы позитивно зачудуют жытелів Ґорлиц. До 7. серпня/авґуста діти і молодіж, іх родиче, а тіж сеньоры, можут корыстати зо зрыхтуваных занять, атракций і помочы. На каждый ден зрыхтуваны сут інчы атракциі, примірно конкурс гры в пилку, шахы, стріча з подорожником, акция прятаня міста ци родинный пікнік. Акция має на ціли помагати потрібуючым і інспірувати люди до позитивных діянь для другого чловека і локальной соспільности. В часі Тыжня Позитивных Ініциятив будут тіж ведены акциі для локальной соспільности і міста, такы як прятаня улиц ци поміч для сеньорів.