Сумар дня на 30. листопада/новембра 2022 р.

Приносиме вам сумар медияльной ґрупы ЛЕМ.фм+ на ден 30. листопада/новембра 2022 р.

Кєрмеш в Михалові

21. листопада/новембра (8. листопада/новембра за старым стильом) в Михалові проходили святочны богослужыня на праздник св. Архістратига Михала Архангела, покровителя місцевой православной церкви. Кєрмеш был і нагодом до святкуваня 75. річниці істнуваня парохіі. Єй початок был безпосередньо звязаный з акцийом «Вісла» – парохія выникнула з потребы выселеных до Михалова і околиц 33 лемківскых родин з Фльоринкы і 21 украіньскых родин з Жабча і Потуржына на Холмщыні. На празднику присутный был владыка Юрий, архієпископ вроцлавско-щеціньской єпархіі ПАПЦ, ординарий Польского Войска, котрого привитали в порогах храму діти, церковный староста Юрий Куземчак та парох. В божескій літургіі окрем архієпископа Юрия і місцевого настоятеля молили ся о. Любомир Воргач, любіньскій декан, о. Славомир Сороканич і о. діякон Мєчыслав Олеснєвич. На прицерковным плоті была вывішена выстава архівальных фотоґрафій – тых іщы з Дому, Лемковины, а і тых з Михалова, реєструючых парохіяльне жытя, в тым будову церкви.

Грошы для школярів ґорлицкого повіту

В понедільок 28. листопада/новембра в Новым Санчы передали самоурядам середкы на закуп компутерового і діґітального ґратя до ведіня занять, а тіж для едукацийной і психолоґічной підпоры ученикам зо шкіл ґорлицкого, новосандецкого і лимановского повітів і міста Новый Санч. З рук маршалка Малопольщы Вітольда Козловского ґранты высокости близко 200 тис. зл одобрала ґорлицка староста Мария Ґубала. Близко 119 тис. зл піде на зорґанізуваня додатковых занять для молодежы – разом буде то аж 1260 додатковых годин, 75 тис. зл передадут на закуп компутерів, таблетів і інтерактивных моніторів. Ґратя трафит до І (першого) і ІІ (другого) Загальноосвітніх Ліцеів в Ґорлицях і ліцеалистів з Біча і Бобовой.

Ґорлицкій шпыталь серед найліпшых

Пару днів тому BFF Banking Group, што єст лідером в Европі, кєд іде о фінансовый підмет, котрый специялизує ся в факторінґу і пожычках, банковости та услугах звязаных з капіталовыма інструментами, опубликувал результаты черговой едициі зоставліня «Лідеры Заряджаня – найліпше заряджаны публичны шпыталі подля BFF Banking Group». На списку нашол ся Специялистичный Шпыталь ім. Генрика Климонтовича в Ґорлицях. Ранкінґ доцінює публичны єдиниці, котры выказуют ся высоком якістю медичной опікы, котра іде в парі з економічном ефективністю. Є то єдиный такій ранкінґ в Польщы, котрый зосереджат ся на фінансах шпыталів. В семій едициі «Лідеры Заряджаня» взяло участ 317 шпыталів, котры поділены были на пару катеґориій: три подля вартости приходу Нацийонального Фундушу Здоровля та Клінічны Шпыталі і Інституты. Серед десятьох найліпшых шпыталів в катеґориі Контракт з НФЗ од 70 до 149 млн зл нашла ся ґорлицка медична інституция.

Владыка Паісий нагородил медалями Св. Максима Ґорлицкого о. прот. Марка Ґоцко і Романа Савчышына

21. листопада/новембра праздник св. Архістратига Михала Архангела святкували як кєрмеш не лем в Михалові, але і на Лемковині – св. Архістратиг Михал є покровительом церкви в Туряньску, котра як єдина з церкви Польской Автокефальной Православной Церкви в Польщы находит ся на списку світовой спадковины UNESCO. Туряньска церков на храмове свято выполнила ся вірныма та духовныма саноцкого деканату – богослужыня очелил владыка Паісий, архієпископ перемышльско-ґорлицкой єпархіі. Спільна молитва была нагодом, жебы подякувати за закінчыня зовнішнього ремонту обєкту. Так само вознесли молитвы о мир на Украіні та за жертвы акциі «Вісла» і лаґрів в Талергофі і Явожні. На богослужыню присутный был і війт ґміны Команча Роман Бздик. На закінчыня владыка Паісий нагородил медалями Св. Максима Ґорлицкого в подякуваню за опіку над туряньском церквом і заанґажуваня в ремонтовы роботы: місцевого пароха о. прот. Марка Ґоцко і старосту церкви Романа Савчышына.

Фот. www.orthodox.pl