Сумар дня на 30. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 30. серпня/авґуста 2021 р.

В тым тыжни в Креници

В тым тыжни в Креници одбудут ся аж три великы імпрезы. Першом з них єст конґес тыкаючый цифровой безпекы CyberSec, якій буде проходил од середы 1. до пятниці 3. вересня/септембра на креницкым дептаку. В часі конференциі експерты в обшыри цифровой безпекы будут глядати одповіди на потребы модерной економікы. Єдном з тем буде приспішыня цифризациі, якє выкликала пандемія, і звязане з тым збільшыня можливости атаків в віртуальным просторі. Конференция має дати передуманы одповіди на сучасны проблемы звязаны з будучыма технолоґіями. Наступном імпрезом, яка буде проходила од пятниці 3. до неділі 5. вересня/септембра в Креници єст Европейскій Біговый Фестіваль. Зрыхтуваных єст пят трас бігів, котры будут вести Сандецкым і Низкым Бескідами. Іщы єдном подійом, яка одбуде ся в Креници в першый вікенд вересня/септембра, єст Малопольскій Фестіваль Смаку. Будут му товаришыти м.ін. показы варіня і деґустациі локальных страв і продуктів.

Модерне пристанкове задашыня в Бобовій

До рекреацийно-спортового комплексу в Бобовій долучыл новый обєкт. Одкрытя новопобудуваного пристанкового задашыня одбыло ся в минулу пятницю, 27. серпня/авґуста. Єст то першый такій обєкт в ґорлицкым повіті. В середині находит ся лавка, ґратя до направы біциґлів, інформацийна таблиця, мультімедияльный екран і стация, яка дозвалят набити мобільне ґратя. При пристанку сут і стоякы на біциґлі. Освітліня і находячы ся в середині нарядя будут засиляны енерґійом з фотовольтаічных панелів замонтуваных на задашыню. Кошт інвестициі то праві 70 тис. злотых. 85% квоты ґміна позыскала з середків Европейского Фонду Реґіонального Розвитку Проґрам Інтерреґ Польща Словация 2014-2020.

ХІІ Гарасиміяда

Ґмінный Осередок Культуры в Команчы, Уряд Ґміны Команча і Публична Бібліотека в Команчы просят на 12. едицию Гарасиміяды, подіі дедикуваній Єжы Гарасимовичови і його творчости. Імпреза одбуде ся в пятницю, 3. вересня/септембра, о год. 15.30 в Реставрациі «Під Коминком» в Команчы. В проґрамі м.ін. рецитациі вершів Гарасимовича, завершыня плястичного конкурсу «Звукова подорож в творчіст Єжы Гарасимовича», прелекциі запрошеных гости, проєкция остатнього інтервю з Єжы Гарасимовичом і концерты. Подіі будут тіж товаришыти выставы выпаляных в дереві прац Александра Ясіцкого і фотоґрафій Анны Падамчык-Будзин, як і творів зробленых в часі малярскых пленерів пн. «Бєщады малюваны поезийом».

Ближыт ся Світовый Конґрес Русинів

Ближыт ся ХVI Світовый Конґрес Русинів. Припоминаме, што того рока одбуде ся він в днях 10.-11. вересня/септембра на Лемковині. Місцьом засіданя Конґресу буде Крениця, а орґанізатором і ґаздом Стоваришыня Лемків. Конґрес буде мал за задачу м.ін. выбрати нову Світову Раду Русинів і єй ведучого. Окрем того будут проходити бесіды тыкаючы актуальных проблемів русиньской спільноты з цілого світа і вызовів, якы стоят перед Русинами в найблизшых роках. В рамках Конґресу одбудут ся і культурны подіі, такы як выставы ци концерты.