Сумар дня на 30. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 30. серпня/авґуста 2022 р.

Експозиция про Лемків і Руснаків в Каштели Шередія

Як інформувала аґентура TASR, в Каштели Шередія з ХVI ст. зрядит село Зборів в окресі Bардиів музейну експозицию. Подля старосты села Яна Шуркалы каштель єст правдоподібно найстаршом світском будівльом в інтравіляні села. Побудували го Шередійовы, котры в тым часі рядили маковицком державом. В 1969 р. каштель потерпіл в пожарі, одтовды будова ішла до занепадку, зато же не зробили стріхы. Сім років тому з ініциятивы Здружыня на Захрану Зборівского Замку і села повело ся зробити новый дах. З проґраму трансграничной спілпрацы Interreg V-A Польща – Словация 2014-2020 село здобыло середкы на проєкт «Забыта краіна Лемків і Руснаків». Цілю єст реконструкция обєкту, котру як раз реализуют. Плянуют в каштели зрыхтувати музейну выставу присвячену маковицкій державі, але і культурі Русинів. Будовляны роботы тырвают од кінця минулого рока, і мают ся закінчыти в грудни/децембрі того рока.

XI Етноґрафічный Роверовый Райді Слідами проф. Романа Райнфуса

Музей Дворы Карвациянів і Ґладышів в Ґорлицях, одділіня Скансен Погіряньского Села в Шымбарку просит на шторічный роверовый райд. Подія пройде в неділю, 11. вересня/септембра. Хто має дяку взяти участ в XI Етноґрафічным Роверовым Райді Слідами проф. Романа Райнфуса, має до выбору 4 трасы долгости 55, 40, 35 або 7 км, якы мают ріжный рівен трудности. Найдолша та найтруднійша траса веде через лемківскы села, зачынат ся в Ганчовій і іде м.ін. через Бліхнарку, Реґєтів, Новицю ци Білянку. Для каждой з трас метом буде Скансен Погіряньского Села в Шымбарку. Тогорічный ліміт участників то 120 осіб, а кошт вписового то 40 зл для осіб родженых перед 2004 роком і 20 зл родженых по 2005 році. Інтернетовый формуляр зголошынь і вымаганя трас находят ся на офіцийным сайті Музею Дворы Карвациянів і Ґладышів.

«Никыфор. Малярство» – выстава доступна лем до кінця вакаций

Іщы лем днес і заран мож обзерати выставу творів вызначного лемківского маляря-примітивісты пн. «Никыфор. Малярство». Цілый вакацийный період в Пєніньскым Музею, якій ся находит в Шляхтовій при ул. Лемківскій 37, одкрыта была выстава образів Епіфана Дровняка – єдного з найвыдатнійшых в істориі малярства артистів з кругу штукы называной наівным малярством.

«Туристичны Скарбы Малопольщы» –  конец часу на зголошыня кандидатур

Тырват четверта едиция конкурсу «Туристичны Скарбы Малопольщы». Його цілю єст нагородити найбарже атракцийны, новаторскы і приязны для туристів місця. Конкурс складат ся з трьох етапів. Першый тырвал буде іщы лем до заране, 31. серпня/авґуста, і треба зголошувати кандидатуры. На сайті Малопольского Воєвідства находит ся анкєта, через котру мож зголосити кандидата, та цілый реґулямін і вымогы, котры мусит сполняти. Як і в попередніх роках, змаганя пройдут в в 6-ох катеґориях: місце з климатом, найбарже інтересуючый туристичный пут, подія, унікатова туристична атракция, одпочынок на селі і в гостині.