Сумар дня на 30. січня/януара 2024 р.

Приносиме вам сумар медияльной ґрупы ЛЕМ.фм+ на ден 30. січня/януара 2024 р.

Найліпшый результат в істориі Нижньошлезской Желізниці

Понад 19 млн пасажерів скорыстало в 2023 році з услуг Нижньошлезской Желізниці. То найліпшый результат в іх цілій 15-річній істориі. Для порівнаня, в 2009 році, першым році полного фунґуваня, компанія продала понад 300 тис. білетів. Як подал маршалок нижньошлезского воєвідства Цезарий Пшыбыльскій, через остатніх пят років влучыли до желізничной сіти місцевости на Нижнім Шлеску, в котрых жыє близко 200 тис. осіб. Одзыскали они доступ до высокой якости публичного транспорту і не сут уж комунікацийно выключены. То потяговы і автобустовы получыня прим. до Любіна, Хоцянова і Собіткы. Желізниця на Нижнім Шлеску через пару найблизшых років дотре до іщы векшого чысла місцевости. Окрем додавня новых напрямів компанія хоче тіж зліпшыти оферту на уж істнуючых леніях, м.ін. збільшыти чысло получынь. Уж тепер денне чысло переіздів на трасі Вроцлав-Ліґниця перекрочыло 30 получынь. Плянуваны ревітализациі леніі спричынят, же єдином нижньошлезском столицьом повіту лишеном без желізничного получыня будут Польковиці. Але і там штораз частійше бесідує ся о приверніню получын, што мало бы служыти рухови вколо Аґломерациі Мідьового Басену. Жебы мочы сполнити тоты амбітны пляны, Нижньошлеска Желізниця хоче в найблизшым часі повекшыти свою флоту о новы потягы.

Стріча про сакральну творчіст Юрия Новосільского в Ґданьску

В минулу пятницю 26. січня/януара Нацийональный Музей в Ґданьску во спілпрацы з православном парохійом св. Миколая в Ґданьску зорґїнізувал наукову стічу на тему сакральной творчости Юрия Новосільского. Цілю дебаты было пояснити основу феномену творчости артисты, а тіж, якы інновациі ввюл до сакральной штукы. Бесідувано і о теолоґіі Новосільского в іконі та зоставліню повоєнной сакральной штукы з тым, што запропонувал артиста. Стріча одбыла ся в православній церкви св. Миколая в Ґданьску, де находит ся ікона Розпятя авторства Юрия Новосільского, выконана в 1954 р. Стрічы товаришыло одкрытя выставы інспіруваной творчістю Новосільского і концерт церковной музикы.

Ґміна Польковиці позвалят жытелям одробити задолжыня

Задолжены жытелі локалів будучых власністю ґміны Польковиці можут одпрацувати чыншовы залеглости. В тій ціли особы з задолжыньом можут зголосити ся до уряду ґміны. Денно ґміна позвалят на одпрацуваня залеглости максимально 30 особам. Сут то головно консервацийны і реновацийны працы, выконуваны на маєтку ґміны, в школах, предшколях і зеленых обшырях. Як подал віцебургомайстер ґміны Кжыштоф Нестер, такє нарядя дає должникам находячым ся в нелегкій жытьовій ситуациі почутя безпекы і шансу на позбытя ся долгів незалежно од фінансовой ситуациі.

Лемковина Вінтер Трейль

Іщы лем тыжден мож ся зголошувати до участи в 5. едициі Лемковина Вінтер Трейль. Є то зимова версия популярных змагань в літаню по верхах і убочах Лемковины. Зрыхтуваны сут три трасы, долгости 18, 33 або 55 км. Мета вшыткых трас буде ся находила в Івоничы. Старты двох долшых трас заплянуваны сут в Яслисках, а найкоротшой в Івоничы. Змаганя пройдут в суботу 17. січня/януара, а записы приниманы сут іщы до середы 7. лютого/фебруара.