Сумар дня на 30. січня/януара 2025 р.

Приносиме вам сумар медияльной ґрупы ЛЕМ.фм+ на ден 30. січня/януара 2025 р.

Проблемы з фінансовом підпором має і «Ластівочка»

Перед дeякым часом інформували сме о проблемах Музею Лемківской Культуры, якій од 1. лютого/фебруара змушеный єст завісити свою діяльніст. Причыном є брак одповіднього фінансуваня діяльности Музею зо стороны Міністерства Внутрішніх Справ і Адміністрациі. В подібній ситуациі сут і інчы меншыновы орґанізациі, м.ін. ЛАПіТ «Ластівочка», якій діє при Кружку Стоваришыня Лемків в Пшемкові. О планній фінансовій ситуациі колективу на посліднім засіданю Головного Заряду Стоваришыня Лемків розповіл Євген Габура, ведучый Кружка в Пшемкові. Як раз, «Ластівочка» од років отримує дотацию на тым самым рівни. Як примір мож подати, што 30 тис. зл – дайме на то двадцет років тому – значыло штоси більше як тота сама сума грошы в 2025 р. Євген Габура заповіл, што так само задумує ся над будучым дільности колективу, тым більше, што дотеперішні обіцянкы зо стороны Міністерства щезли на ничым.

В Ліґници буде пересідковый центр

В Ліґници думают над будовом пересідкового центра. В тій ціли одбыла ся стріча Віцемаршалка Нижньошлезского Воєвідства Михала Радо з Президентом Ліґниці Мацєйом Купайом. На стрічы была бесіда о концепциі будовы центра в обшыри Колейового Дворця в Ліґници. Цілю будови буде получыти ріжны середкы транспору: потягы, автобусы, а тіж рух пішых, авт і біциґлів. Жытелі реґіону мали бы через тото отримати ліпшу доступніст публичного транспорту. О результатах будовы центра місто буде іщы інформувало.

В Меджелабірцях побудуют водный резервуар

В Меджeлабірцях буде выбудуваный водный резервуар, котрый приспіє до адаптациі міста на зміну клімату. На тот проєкт місто Меджелабірці здобыло беззворотный фінансовый вклад в высокости 2 милийонів евро з Проґраму Словация, і то без конечности спілфінансуваня з боку самоуряду. Інформувал о тым уряд міста на своім вебсайті. Цілью проєкту є выбудувати водозатримуючы нарядя, котры дадут можніст затримати і нагромадити дощову воду. Водный резервуар має полнити краінотворну, естетичну, рекреацийну і природничу функцию.

В суботу премєра в Рускій Бурсі

А на конец припоминаме, што уж в найблизшу суботу, в першый ден лютого/фебруара, просиме до Руской Бурсы в Ґорлицях на пєсу «Три ябка». Представліня зачне ся о 17.00 год. В минулым році Стоваришыня «Руска Бурса» в Ґорлицях в рамках свойой діяльности вырішыло збогатити лемківску драматурґію і попросило о написаня пєсы Станіслава Білого, вызначного словацкого автора. Білый в своій пєсі одкрыват універсальны вопросы, но делікатно іх прифарблює лемківскыма реалиями. Пєса была писана на конкретны три акторкы: в ролях выступлят Івона Іскра-Криницка, Наталия Малецка-Новак і Моніка Тылявска. Станіслав Білый пєсу написал і вырежысерувал. Драматурґію робил Петро Медвідь, котрый текст переклал на русиньскій язык. Адаптацию тексту на лемківскій стандард зробил Петро Криницкій. Музику скомпонувал Матуш Павлик, а зо сценоґрафійом поміг Мирко Пелехач. Пєса «Три ябка» могла быти зреализувана завдякы підпорі Міністерства Внутрішніх Справ і Адміністрациі. Красні просиме!