Сумар дня на 31. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 31. грудня/децембра 2021 р.

Любовнянскій Музей позитивно оцінил 2021 рік

Любовняньскій град і скансен одвиділо в тым році близко 170 тис. туристів. Музей позитивно оцінил 2021 рік. Як повіл про аґентуру ТАСР директор Далібор Мікулик, чысло одвиджаючых было для них милом несподіванком. Покля в інчых памятках чысло одвиджаючых в тым році впало і о 60%, Любовняньскій Музей однотувал знижыня на рівни близко 20%. Музей зреализувал в тым році і вельо проєктів. Медже інчыма удоступненый по реконструкциі был палац Любомирскых, што подля директора помогло притягнути туристів. Туристичный рух підтримали в 2021 році люде зо Словациі. З огляду на пандемію доступ Старой Любовні был утрудненый для польскых гостів, котры переважно творят коло 40% одвиджаючых.

Послідній ден колекты на печатаня лемківской кухарской книжкы

Припоминаме, што іщы до кінця того дня тырват соспільна колекта на печатаня першой лемківской кухарской книжкы. В публикациі найде ся аж 70 провіреных ориґінальных рецептур. Каждый, хто хоче мати примірник книжкы, може зробити передплату в соспільній кампаніі збераня грошы на выпродукуваня книжкы на сайті zrzutka.pl. Колекту глядайте під назвом: Łemkowskie smaki – wydanie książki kucharskiej.

Гірскы ратівникы припоминают як безпечні провести час на лыжах

Ратівникы з Креницкой Ґрупы Гірской Охотничой Ратівничой Стражы GOPR уж пару днів патролюют схылы в Креници, Верхомли і Рытрі. Припоминают, як безпечні провести час на лыжах ци сновборді. Найважнійше єст звертати увагу на ічных, одповідньо достосувати скоріст і можливости. Гірскы ратівникы припоминают тіж, жебы скоро втечы в бік, коли будеме мати выпадок на трасі, а на схылы підходити лем іх краями. Треба тіж дотримувати означынь на трасі, а коли видиме чыісый выпадок прібувати му помочы, м.ін. через телефонічне повідомліня одповідніх служб.

Вшыткого доброго в Новым Році!

Днес, 31. грудня/децембра, пращаме старый і витаме новый рік. З той нагоды хочеме передати вшыткым слухачам нашого радия і чытачам порталю lem.fm новорічны желаня на тот Новый 2022 Рік. Най бы Новый Рік был ліпшый од попереднього. Вшыткого доброго, здоровля і вшыткого, чого си уж лем самы захочете – желат радийо Лем.фм і Стоваришыня «Руска Бурса» в Ґорлицях.