Сумар дня на 31. липця/юлия 2024 р.

Приносиме вам сумар медияльной ґрупы ЛЕМ.фм+ на ден 31. липця/юлия 2024 р.

Прокуратура Комісиі Гоніня Злочынів проти Польскому Народови зас займе ся справом акциі «Вісла»

Як сме інформували, Стоваришыня «Руска Бурса» в Ґорлицях та Стоваришыня Лемків, зложыли осіню минулого рока офіцийне зажаліня до Округового Суду в Варшаві, в котрым в цілости заскаржыли постановліня выгашыня досліджыня Інституту Нацийональной Памяти в справі акциі «Вісла». Округовый Суд в Варшаві постановом з дня 17. липця/юлия тр. розсмотріл зажаліня обох выміненых орґанізаций та зажаліня інчых орґанізаций і осіб м.ін. Созюу Украінців в Польщы і Обєднаня Лемків. Округовый Суд в Варшаві рішыл скасувати заскаржену постанову і передати справу до Інституту Нацийональной Памяти Одділовой Комісиі Гоніня Злочынів проти Польскому Народови до дальшого ведіня. Суд ствердил, што представлена прокуратором ІНП арґументация є неправильна і конечна є комплексова оціна фактичного стану справы, в тым схоснуваня знаня авторів науковых робіт на тему акциі «Вісла» – осіб о найвекшым науковым доробку в тій обшыри, і аж товды підняти рішыня в справі. Припомнийме, што іде о скандаличну постанову прокутаторкы Комісиі Гоніня Злочынів проти Польскому Народови в Ряшові, яка не виділа основ потвердити, же выселіня Лемків і Украінців было злочыном проти людства, ани комуністичным злочыном, а в поясніню подала шор інформаций, якы не сут згідны з історичном правдом і передают фальшывый образ выселіня. Справа выкликала шырокы протесты. О поступах в тій справі будеме інформувати.

Старша нич думано

Пят деревяных церкви на східній Словациі перешло дендролоґічны баданя, котрых цілю было окрислити докладне датуваня храмів і дерево, з котрого были выбудуваны. В пряшівскым реґіоні збадали церкви і костелы в Кєжмарку, Брежанах і Высокых Татрах, а в кошыцкым – в Рускій Бустрици і Іновци. Баданя побраных елементів проходило в Денролоґічній Лябораториі Мендельового Університету в Бырні. Результаты анализы двох з пятьох баданых обєктів потвердили датуваня выбудуваня так, як ся о тым пише в фаховій літературі. В припаді русиньской церкви св. Михаіла Архістратига в селі Іновец баданя потвердили, што церков вознесено з соснового дерева, але выказали інче датуваня, як доступна література. Отже церков подля записів вознсели в 1836 році, зас баданя выказали, што сосны на храм были зрубаны в зимі на зламі років 1772 і 1773. Окрем сосны схоснували при будові той церкви тіж явір, смерек, тополю і березу.

В Маґурскым Нацийональным Парку будут іздити електриками

Маґурскій Нацийональный Парк отримал шіст електричных авт з Міністерства Климату і Середовиска. То єдна з форм промуваня зеленой енерґіі через нацийональны паркы, а тіж підпертя уділене з думком о природі і туристах, што приходят до парку. Директор Парку Норберт Кєць поіфнормувал, што кєд іде о ладуваня авт, то сут незалежны, бо мают три внутрішні стациі ладуваня, а в пляні є іщы будова загальнодоступной стациі в Крампній при Осередку. Зероемісийны авта на стані Парку мают ограничыти занечыщыня повітря, зменшыти хоснуваня палива і рівен галасу. В дальшых плянах Маґурскій Нацийональный Парк має іщы вкрыти половину паркінґу перед будинком дирекциі Парку фотовольтаіком і доложыти 100-кіловатовый маґазин енерґіі.

Новы інвестициі в ґміні Ропа

Ґміна Ропа підписала догваріня з выконавцями інвестиций на роботы за понад 7 млн зл. Фірма Ґодром займе ся будовом і модернізацийом дороговой інфрастурктуры, а фімра Гажбуд зробит черговы одтинкы водопроводу і сіти санітарной канализациі. Ремонты доріг будут обнимати одтинкы в самій Ропі, в Климківці і в Лоси. Термін закінчыня дороговых ремонтів то вересен/септембер 2025 рока, а будовы канализациі і водопроводів – осін 2026 рока. Реализация вшыткых інвестиций пройде при фінансовій підпорі з проґраму Польскій Лад.