Сумар дня на 31. марця 2022 р.

Приносиме вам сумар медияльной ґрупы ЛЕМ.фм+ на ден 31. марця 2022 р.

Данута і Іван Дзюбины з Нагородом ім. Райфуса

Приємно нам заявити, што в рамах тогорічной едициі Нагороды ім. Романа Райнфуса Заряд Малопольского Воєвідства признал оцініня Дануті і Іванови Дзюбинам, основателям і ведучым Лемківской Едукацийной Загороды «Дзюбинівка» в Ґладышові. Выріжніня было признане в «узнаню за взірцьову реконструкцию традицийной лемківской загороды в Ґладышові і створіня незвычайного місця, де істория, традиция і культура Лемків взаімно ся дополнюют, а завдякы веденій едукацийній діяльности жыют в серцях молодых поколінь». Фундация Лемківска Загорода была основана в 2016 р. Єй головным цільом єст промуваня і охорона культуровой дідовизны Лемковины. Нагорода ім. Романа Райнфуса признавана єст за выдатны осягніня в обшыри плеканя локальной культуровой достоменности в Малопольщы. Тым престіжным оцініньом в попередніх роках были нагороджены м.ін. Павел Стефановскій, Петро Трохановскій ци Федір Ґоч.

Кінчыт ся ремонт ґорлицкого басену

Ближыт ся конец ремонту ґорлицкого басену. Місто уж тепер похвалило ся знимками з середины обєкту. Модернізация є уж такой на завершыню, што значыт, же неодолга зас будеме мочы піти на ґорлицкій басен. Згідно з заповідю, обєкт буде одданый уж на початку мая, значыт о місяц. Зроблено нову елевацию, але найбільше змін є в середині. Oкрем басену, саун і джакузі буде окдрыта сольна яскыня. Інвестиция то бл. 7 мілийонів зл. За тоты грошы не лем выремонтували басен, але был він і розбудуваный. Зробили медже інчыма специяльну зону, де находят ся сауны.

«Козакы» Мирка Трохановского

14. квітня/апріля в ґорлицкій Ґалериі Двір Карвациянів пройде вернісаж выставы Мирослава Трохановского пн. «Украіньскє козацтво». Початково выстава мала наголовок «Місто нескінчене», але як пояснят автор, з причыны атаку Росиі на Украіну рішыл змінити характер експозициі. Тым самым хоче вказати свою підпору воюючым о свойу державу Украінцям. Мирослав Трохановскій єст выдатным лемківскым іконописцьом і малярьом. Єст основательом карпатской працовні іконописаня в Білянці під назвом «Мандиліон». Занимат ся він тіж малюнком, рисунком і різбом. Цікавит го реалистичне і абстракцийне малярство. Його творчіст то головно навязуваня до істориі украіньскых козаків, як тіж русиньскых збійників. Творит і карпатскы краєвиды і лемківскы церкви. Выставу мож буде обзерати до 11. мая. В звязку зо зміном тематикы выставы, фурт можете сперати выданя принагідного каталоґу выставы. Збірка потырват іщы пару дни на сайті zrzutka.pl.

Гуменне «Містом Культуры 2024»?

Єдно з міст на Пряшівскій Руси – Гуменне, має шансу отримати званя «Місто Культуры 2024». Приготовліня і реализацию проєкту підпорює Фонд на Підпору Уменя і здружыня Культурна Ініциятива Гуменне. Амбіцию тоту оголосили вчера власти міста. Проєкт тот – подля пріматора міста – міг бы быти великом шансом, зато што участ в ним і отриманя званя принесе якіст і даст можніст дальшого культурного розвитку місту. Завдякы тому не лем Гуменне, але і місцевости докола него будут мочы якістнійше ся розвивати, што влине на туристів з цілой Словациі і околичных держав.