Сумар дня на 31. січня/януара 2022 р.

Приносиме вам сумар медияльной ґрупы ЛЕМ.фм+ на ден 31. січня/януара 2022 р.

Реакция посла Рышарда Ґаллі на одшмаріня Соймом поправок Ценату в справі поправок до буджету

Як сме перше інформували, в четвер 27. січня/януара, польскій Сойм одшмарил вшыткы поправкы Сенату до буджетового закону на 2022 р., в тым поправку о приверніню субвенциі на вчыня языків нацийональных і етнічных меншын та реґіонального языка в школах в высокости блиско 40 млн злотых. Як подала Ведуча соймовой Комісиі Нацийональных і Етнічных Меншын Ванда Новіцка, менша субвенция має тыкати німецкой меншыны – вымір вчыня німецкого як меншынового языка має быти зменшеный о дві годины тыжньово. На рішыня сойму іщы в пятницю зареаґували посланці Громадяньской Коаліциі, Лівиці і представитель німецкой меншыны в Польщы Рышар Ґалля. Подля них такє рішыня єст незгідне з польскым правом і підписаныма Польщом трактатами. Ґалля звернул увагу, же рішыня Сойму вдарит в діти, котры мают згідно з польскым законодавством право вчыти ся меншынового языка. Припомянул, же Польщу обовязуют м.ін. трактатовы реґуляциі тыкаючы охороны нацийональных меншын і реґіональных языків. Реализация тых записів не єст можлива, кєд дошло до нарушыня конституциі, закону о меншынах ци закону о освіті. Не є тіж певности, ци дальшы того рода дискримінацийны діяня не будут вдаряти в дальшы меншыны.

Нова атракция в Креници

Як поінформувал бургомайстер Крениці Пьотр Рыба, креницкы Загороды Сил Натуры сут уж освітлены. До освітліня были схоснуваны енерґоощадны ледовы лямпы. Нова атракция, яка ся находит на полудньово-західній страні Парковой Горы, має быти одкрыта для одвиджаючых на яр того рока. Місце буде мало едукацийный характер, дозволит познавати права і явиска, якы рядят натуром. Головну ролю в експозициі будут мати силы землі, воды, огня і повітря. Окрем спацеровых алейок, туристы будут мочы выйти на видокову вежу з обсервацийным пунктом ци захоплювати ся парком мініятур з найкрасшыма креницкыма будинками. На доізд до Загороды має позволити 450-метрова дорога, при котрій будут ся находити паркінґовы місця. Ціліст має быти комунікацийно повязана зо Здройовым Парком і ул. Еберса.

Ци в Команчы поіздиме на лыжах?

В Команчы хотят реактивувати лыжню стацию. Причыном єст невеликій туристичный рух в зимовым періоді. Ґміна має в плянах реактивувати лыжню стацию на горі Дышова. Така спортово-туристична інфраструктура мала бы ожывити туристичный рух в Команчы і околицях. Тырвают бесіды з Лісовом Ґрунтовом Спільнотом, до якой належыт земля, на котрій стоіт старый ґмінный вытяг. О середкы на реализацию прєкту ґміна має внескувати в рамках підпоры з Польского Ладу.

Чытачте «Бесіду»

Доступне єст уж нове чысло часопису Стоваришыня Лемків – «Бесіда», ч. 1 (184) за місяці січен/лютый 2022 р. В першым тогорічным выданю можеме чытати м.ін. статі Наталиі Малецкой-Новак односячы ся до міністерияльных дотаций на діяльніст лемківской меншыны. Андрий Ковальскій приносит нам реляцию з ХІV Стріч Трьох Поколінь з Лемківском Культуром в Пшемкові. В статі Петра Трохановского пн. «Жыва Памят» можете чытати реляцию зо святкувань Дня Русинів в Польщы 2021. Севериян Косовскій пише про доступный одтепер онляйн архів Апостольской Адміністрациі Лемковины. В «Бесіді» найти можете тіж спомины на помершого знаного лемківского маляря Штефана Телепа, якій одышол кіцньом 2021 р. В номері нашли ся і желаня для Адама Барны, з нагоды прекрасного ювілею прожытых 95 років. Своє оповіданя публикує тіж сучасный лемківскій писменник Павел Ксенич.