Сумар дня на 31. січня/януара 2024 р.

Приносиме вам сумар медияльной ґрупы ЛЕМ.фм+ на ден 31. січня/януара 2024 р.

Єднак буде маншынова устава на Словациі?

Новый полномічный влады Словацкой Республикы про меншыны Акош Горонь подал, што основом для зрытуваня уставы о нацийональных меншынах може быти материял, котрый выпрацувал попередній Уряд Полномічного Ласла Буковского. Поінформувал о тым в контекті послідніх донесінь представників партиі Magyar Szövetség – Мадярска Алиянция, котрым міністерка культуры Мартіна Шімічкова передала нове становиско в тій справі премєра Роберта Фіца. Дотепер справа схваліня закону тыкаючого меншын не была ани в Проґрамовым Выголошыню Влады з жолтня/октобра минулого рока, ани в Пляні Леґіслятивных Задач влады СЛ на 2024 рік з грудня/децембра 2023 рока. Подля представників партиі Мадярска Алиянция міністерка культуры мала так само потвердити представникам мадярской партиі, што не дойде до злучыня Фонду на Підпору Культуры Нацийональных Меншын з Фондом на Підпору Уменя, што было плянуване в 2024 році, а проти чому міцно протестували представникы меншын і умелецкой соспільности.

Европа може познати лемківску поезию

Черговый успіх лемківской літературы – як раз вказало ся найновше выданя Trafika Europe пн. Essential New Literature of Lesser-Known Languages of Europe. В часописі презентуваны сут урывкы выдатной сучасной літературы в тлумачыню на анґлицкій язык, што вказали ся ориґінальні в языках, котры сут менше знаны особам споза даной соспільности. Што тішыт – серед выбраных до антолоґіі єденадцетьох фраґментів сут тіж нашы – лемківскы вершы авторства Олены Дуць-Файфер в тлумачыню на анґлицкій язык авторства Елейн Русинко і Богдана Горбаля. Окрем лемківскых, до перегляду найліпшых текстів літературы з Европы трафили тоты, што ориґінальні были написаны по корнвалийскы, латґальскы, люксембуржскы, фарерскы, саамскы, бретоньскы, ірляндскы, баскійскы і ромскы. Шефредактор часопису Клейтон МакКі підкрислят, што презентуваны тексты то лем выбір, част з імпонуючой сучасной літературы, яка вказує ся в языках, котры сут менше знаны особам споза соспільности. «А прецін, подібні як вшыткы европейскы літературны творы, остают творами штукы і культуры, котры вказуют штоси о Европі і о світі, в котрым вшыткы жыєме» – повіл. Выданя доступне є на сайті: www.trafikaeurope.org.

«Річника Руской Бурсы 2023» шыроко о лемківскій штуці

Накладом Стоваришыня «Руска Бурса» в Ґорлицях в 2023 році печатана была іщы єдна публикация (окрем байок «Горошок, бобошок» та збіркы поезиі Петра Медвідя) – то черговый номер «Річника Руской Бурсы». Девятнадцетый номер посвяченый был темі штукы. Тексты поміщены в Річнику презентуют ріжны аспекты плястичных і візуальных штук, вказуючы розбудуване пізріня на достоменностьову штуку звязану з русиньскым культуровым простором. Дописы поміщены в часописі презентуют ріжнорідный погляд на лемківску штуку, одкликуючы ся і до ісотричных контекстів, і анализуючы сучасны тредны. В головній части, Дискурсі, поміщеных є сім дописів, авторства: Тадеуша Лопаткєвича, Олены Дуць-Файфер, Михала Шымко, Каміля Федериґы і Доміникы Цєпляк, Ніка Купеньского, Любы Кральовой та Яны Трущыньской-Сивой. В Інспірациях нашол ся допис Павла Роберта Маґочія, а рецензию і справопис зрытувала Наталія Малецка-Новак. Част Документы приносит незнаны дотепер факты і архівальны материялы тыкаючы передвоєнной робудовы Руской Бурсы в Ґорлицях та самых початків Товариства Руской Бурсы. Річник неодолга буде доступный в склепі на сайті лем.фм.

Новый кандидат на бургомайстра Польковиц

Кжыштоф Нестер, теперішній заступця бургомайстра Польковиц оголосил, што буде кандидувал на бургомайстра Польковиц в найблизшых самоурядовых выборах. Оголосил тіж свій проґрам «Конкреты для Польковиц», якій закладат реализацию десятьох пунктів в десятьох обшырах протягом найблизшых десятьох років. Серед думок нашли ся будова видовисково-спортовой галі з родинным парком розрывкы, будова дому опікы для сеньорів, розбудова осередка здоровля і векше чысло дохторів, до того проґрам розбудовы мешкань ци плян розвитку транспорту. На свого заступцю Кжыштоф Нестер як кандидата подал Бартоша Мушыньского, є то абсольвент еконономіі, тренер, выховавця, соспільник та бывшый спортовец.