Сумар дня на 4. червця/юнія 2020 р.

Приносиме вам сумар медияльной ґрупы ЛЕМ.фм+ на ден 4. червця/юнія 2020 р.

Лемківскы капличкы доцінены

Знимка авторства Яцка Полякєвича з капличком на Лабівскій Поляні нашла ся серед пятьох, котрым признали головну нагороду в конкурсі «Капличка за меджом», орґанізуваным Малопольскым Центром Культуры Сокіл в Новым Санчы. Про конкурс сме інформували в рамках нашых вісти. На західній Лемковині, медже Лабовом а Верхомльом, в гірскым пасмі Креницкой Яворины є альпійска лука, значыт поляна, а точнійше – Лабівска Поляна. Давнійше жытелі сусідніх сел, польскых і лемківскых, выпасали гын уці. Названя взяли од лемківского села Лабова. На поляні находила ся колиси хыжка до полюваня ґрафа Адама Стадницкого. Вчас ІІ світовой войны спалили єй партизанты. Тепер находит ся там туристична колиба, камінный памятник та капличка. Як раз знимка авторства Яцка Полякєвича вказуюча стопову капличку в ошади, зимовом пором, на тілько захопила жырі конкурсу, што не лем заквалифікували єй до дальшого етапу, але і признали єдну з головных нагорід. До конкурсу мож было прислати знимкы капличок, якы находят ся на обшыри малопольского воєвідства. Разом зголошено аж 446 фотоґрафій.Серед выріжненых нашли ся дві з Лемковины. То знимка капличкы в Андриівці та креста з околиц Высовой.

Едукация русиньскых писателів в Войводині

Редакция «Руского слова» в Новым Саді розписала конкурс на вытворіня прац з обшыри креативного писаня в рамках проєкту «Едукация русинськых писателів про діти». Сес проєкт то серия, котру «Рускє слово» орґанізує при підпорі фонду для нацийональных меншын Міністерства державных справ і локальных самоурядів. Варшаты креавтивного писаня сут направлены на уж активных писателів, котры пишут поезию і прозу для діти і дорослых по русиньскы, але і на новых авторів, котрых роблят для діти, або дотепер не рыхтували своіх творів для наймолодшых. Варштаты будут тырвати од червця/юнія аж по вересен/септембер т.р. Курс буде веденый онлянй. Плянована стріча з авторами мала бы ся одбыти, коли поліпшыт ся сутиация з епідемійом. Варштаты буде вела м.ін. Мелянія Рымар, редакторка часопису для діти «Заградка». Результаты прац по русиньскы будут вказуваны в рамках выдавництв редакциі «Рускє слово». Варштаты, а і конкурс з креативного писаня, то – як зазначают орґанізаторы – шанса на тото, жебы русиньскы медиі і выдавництва в Сербіі отримали новых спілробітників. Варшаты будут ведены вколо тем русиньской достоменности, культуры, традициі і языка.

Саноцкій музей запрашат в своі порогы

В звязку зо знесіньом ограничынь, Музей Народного Будівництва в Саноку інформує о годинах одкрытя обєкту. І так, до музею мож заходити штоден, в тым і в неділі і свята в год. 8.30 – 17.30. Окрем постійных експозиций, на ошбыри музею од вітірка до неділі в год. 9.00 – 16.00 мож позерати м.ін. на выставу нашых ікон, пн. «Карпатска ікона». Музей припоминат, што звиджаня обєктів внутрі може быти лем з провідником. Очывидно, обовязково треба мати зо собом масочку. На обшыри музею находит ся єдна з найкрасшых лемківскых церкви – церков Рождества Пресвятой Богородиці з Ріпок, котра была під під конец 90. років поставлена на обшыри музею в тзв. лемківскым секторі. На днес то єдна з цікавшых експозиций в Музею Народного Будівцнитва в Саноку. Деталі про актуалны ограничыня і можливости звиджаня найдете на музейным сайті.

Пряшів одкрыват своі фонтаны

В центрі Прашівской Руси – місті Пряшові, в набйлизшых днях останут одкрыты фонтаны. Інформувал о тым уряд міста. На обшыри міста буде іх вшыткого девят, а то в центрі містах і на поєдных осілях. Фонтанна СНП на Намістю миру і фонтана Анґелінум на осіли Секчов будут і надале одставлены. Бесідувал о тым, м.ін. медияльный секретар міста Владимір Томек. В Пряшові од років є звыком ожывити фонтанны уж на яр. Того рока зимова перерва продолжыла ся в неплянуваный спосіб в звязку з пандемійом коронавіруса. Выходжыня з ней і што раз ліпша сутиация позволили на тото, фонтанны наново вертают до місцецкого краєдиву, што тішыт Пряшівчан, а і туристів, котры неодолга зас будут одвиджати наше славне місто.