Сумар дня на 4. грудня/децембра 2019 р.

Приносиме вам сумар медияльной ґрупы ЛЕМ.фм+ на ден 4. грудня/децембра 2019 р.

Лемкы, Кашебы, Шлезакы і Вілямовяны в Омбудсмана

29. листопада/новембра тр. в Бюрі Омбудсмана Польщы в Варшаві проходила дебата про охорону языковых прав. Подія орґанізувана была через Омбудсмана Адама Боднара та выділ «Artes Liberales» Варшавского Університету з нагоды Медженародного Року Корінных Языків (2019) принятого резолюцийом Загального Згромаджыня ОЗН. Подія поділена была на дві части. Першом была бесіда запрошеных експертів про охорону языковых прав, а другом – панель молодых активістів. Присутны были представникы кашебской, шлезской, вілямівской і лемківской меншын, якы бесідували про тото, ци мож іх менувати языковыма активістами та чом і што роблят для хороніня свого языка, а тіж што подля них є найбільшым вызовом для іх языків. Вшыткы представникы вєдно спостерегли, што потрібны сут локальны ініциятивы, выходячы од самых мешнын, жебы едукувати іх членів, усвідомлювати про вагу знаня свого языка. Представланы были тіж заувагы, што підтримка зо страны польской державы взгляом меншын є нестарчаюча.

Рік Русиньского Села 2020

В суботу, 30. листопада/новембра, одбыло ся в Пряшові 30. засіданя Округлого Стола Русинів Словациі. Присутны были і шолтысове сел, котры членами Округлого Стола не сут. Шолтысів запрошено, жебы побесідувати і сконсультувати рыхтуваня і порядок подій, якы пройдут в рамках Року Русиньского Села, котрым плятформа выголосила 2020 рік. Дискутувано тіж про ведіня кампаніі перед повселюдным списком плянуваным на 2021 рік. Рішено о завязаню робочой ґрупы з реґіональныма координаторами, котрых задачом буде реалізувати доєднаны подіі в рамках святкувань Року Русиньского Села. Початком будучого рока опубликуване буде дедикуване подіі лоґо. Кєд іде про справу кампаніі перед повселюдным списком, рішено, што схоснувати буде треба вшыткы можливы формы пропаґациі. В другій части засіданя бесідувано м.ін. про фінансуваня ґрантовых проєктів з Фонду для Підпоры Культуры Нацийональных Меншын на 2020 р.

Родинны знимкы Михаляків, Міхняків, Смеречняків, Вацків та Галущаків

Довершено другій етап проєкту «Архів Новиця-Прислоп». Было то опрацуваня материялу позбераного завдякы тереновым досліджыням в обох селах: Новици і Прислопі. Знимкы і документы здіґіталізувано при схоснуваню Одкрытой Архівізацийной Системы ОСА. Мериторичным опрацуваньом заняла ся етноложка і соспільна активістка Реґіна Паздур. В рамках проєкту здобыла інтересуючы архівалиі з колекциі Музею Народного Будівництва в Саноку. Полный рапорт з кверенд проведеных во спомненій інституциі та в Державным Архіві в Ряшові доступный є на сайті Фундациі Мемо. Гын тіж мож найти мотузкы до сайту ОСЫ і місця, в котрым поміщено колекциі родинных знимок і документів родины Михаляків, Міхняків, Смеречняків, Вацків та Галущаків з Новиці і Прислопа. Колекция з архіву саноцкого скансену на парудесятьох знимках з 1974 рока образує минулу архітектуру і краєвид Новиці. Попри знимках поміщены сут і рисункы з выміруваньом хыж презентуваных на фотоґрафіях.

Концерт лемківскых і польскых різдвяных пісен

Товариство Приятелів Музикы і хор Cantores Carvatiani просят на концерт польскых і лемківскых різдвяных пісен. Концерт одбуде ся в неділю, 8. грудня/децембра, о 17.00 год. в авли Музичной Школы в Ґорлицях. Выступлят: дітячый хор Державной Музичной Школы в Ґорлицях Аколяда, мішаный хор Зоря, Юлия Дошна та хор Cantores Carvatiani. Концерт завершат більшу задачу пн. «Різдвяный проєкт хоральной музикы – Просфора 2019». Його цілю было плекати традицию спільного колядуваня. Хоры брали участ в варштатах, котры вели Луция Берешова – словацка дириґентка, яка наштоден жыє в Барцелоні, та Юлия Дошна, шыроко знана пропаґаторка лемківскых пісен. В рамках проєкту хор Cantores Carvatiani записал платню з колядами і щедрівками. Радийо ЛЕМ.фм є медияльным патроном проєкту і цедечка.

Фот. Анна Капелюх в товаристві сусідів і священника перед старом хыжом, колекция Мариі Вацек (CC BY-NC 4.0), джерело: www.nowicaprzyslup.pl