Приносиме вам сумар медияльной ґрупы ЛЕМ.фм+ на ден 4. грудня/децембра 2020 р.
Ден Русинів в Польщы 2020
Припоминаме, што в тоту суботу, 5. грудня/децембра, пройде презентация публикациі пн. «Перша ліґа парібків» з публицистичныма текстами авторства Ваня Гунянкы, Петра Медвідя і Богдана Ґамбаля, выдавцьом котрой є Стоваришыня «Руска Бурса» в Ґорлицях. З огляду на епідемічну ситуацию і звязаны з ньом рестрикциі подія буде заперта для публикы. Просиме позерати на онляйнову трансмісию на фанпейджы радия ЛЕМ.фм та слухати радия ЛЕМ.фм, на антені котрого так само буде проходила трансмісия. Початок 16.00 година. Дата презентациі книжкы не єст припадкова. Як раз того дня празднуєме Ден Русинів в Польщы, схваленый Світовым Конґресом Русинів на памятку основаня Руской Народной Республикы Лемків. Головным пропаґатором і орґанізатором попередніх святкувань Дня Русинів в Польщы был Богдан Ґамбаль, вызначный лідер русиньского соспільства, якого несподівана смерт попереджена коротком хворотом взяла 2. липця/юлия 2020 р. з того світа. За його стараньом повело ся выдрукувати книжку, хоц сам не встигнул єй видіти. Субота, 16.00 год., радийо ЛЕМ.фм.
Ґаздове взірцьово ся списали
Близко 100 процент ґаздів взяло участ в рільничым списуваню в Польщы. Ґаздове в векшости списували ся выполняючы формуляр доступный в інтернеті або телефонічні. В вынятковых ситуациях з ґаздами безпосередньо контактували ся комісары од списуваня. Повселюдне Рільниче Списуваня тырвало од 1. вересня/септембра до 30. листопада/новембра тр. На основі зобраных даных формувана є аґрарна політика і політика продукту. Участ в списуваню была обовязкова. Малопольскій Воєвода Лукаш Кміта оцінил, што ґаздове в малопольскым воєвідстві списали ся взірцьово. Обовязок тыкал веце як 150 тис. ґаздів, а зреализувало го близко 100 процет ґаздів з обшыри воєвідства. Як подал воєвода, зобраны даны будут хоснуваны до анализы змін, якы прошли в рільництві протягом послідніх років, і будут браны до увагы при творіню новых проєктів розвитку для ґаздів. Припомнийме, што од квітня/апріля 2021 р. рушат в Польщы Повселюдне Списуваня, вчас котрого буде мож окрислити свою нацийональніст і хоснуваный язык, в тым окрему лемківску нацийональніст і лемківскій язык. Подаваны даны будут анонімовы.
Як не вода, то ґаз буде гріл санківскы хыжы?
Ґміна Санкова од років інвестує в еколоґію. То єден з саморуядів, котрый схоснувал вшыткы можливости, жебы жытелі ґміны могли заінсталювати по хыжах соляры до теплой воды ци фотовольтаіку. Сут тіж помпы тепла. Уряд Ґміны од років огрівают, хоснуючы выключні посліднє вымінене. Тепер ведена є експертиза, ци теплый ґаз, што выдобыват ся з діры по ґеотермальным верчыню, в котрій мала быти вода, надаст ся до огріваня обєктів. Думка є, жебы побудувати теплозмінник, значыт інсталяцию до огріваня санківскых хыж. В верчыню панує теплота коло 80 градусів Цельсия, діяґностика має одповісти м.ін. на звіданя, ци температура ся не змінят, а коли ся змінят, то в якых границях і од чого то залежыт, кілько є гын нагромадженого ґазу. Санківска інсталяция, о кілько буде побудувана, буде пілотажова, а тіж надійна для тых, котры так само прібували глядати теплу воду в земли, а з даякых причын ся тото не повело. Ціль є єдна – як найліпше схоснувати енерґію зо середины землі.
Дорогом од Яслиск на Чертижне легше переіхати
Кус веце як мілийон зл коштувал ремонт 2,5 кілометрового одтинка дорогы з Яслиск в страну границі через лемківскы села Липовец і Черемху. Роботы выконал коросняньскій повіт, хоснуючы головні підпору Міністерства Внутрішніх Справ і Адміністрациі. Місцевы на направу міцно знищеной дорогы ждали уж парудесят років. Ціла траса до границі чыслит лем 10 км. Війт Яслиск Адам Даньчак спостерюг, што од сусіднього Чертіжного ділит іх раптом 12 км, а нич про себе не знают. Припомнийме, што в селі тым перед двома роками одкрыли пропамятну таблицю посвячену єдному з найвызначнійшых русиньскых будителів ХІХ ст. – Адольфови Добряньскому. Выремонтувана дорога перед столітями была хоснуваня як єден з головных транспортовых коритарів в Карпатах, котрым перевозили розмаіты продукты, м.ін. вина, якы складували пак в Яслисках.
Коментарі