Сумар дня на 4. липця/юлия 2022 р.

Приносиме вам сумар медияльной ґрупы ЛЕМ.фм+ на ден 4. липця/юлия 2022 р.

Улиця імени лемківского бургомайстра

В Коросні радны міста рішыли упамятнити дві персоны міцно звязаны з містом. Єдном з них єст Модест Гумецкій, Лемко і бургомайстер міста Коросно в роках 1883-1887. Модест Гумецкій вродил ся в 1842 р. в Токарни коло Буковска. Был не лем бургомайстром і радным Повітовой Рады, але тіж поетом ци містецкым дохторьом, котрый борол ся м.ін. з епідемійом холеры. Вмер в 1899 році в Ріпнику. До той поры в Коросні упамятняла го лем таблиця в костелі оо. Капуцинів. Тепер рішыньом радных єдна з улиц міста змінит свою назву на Модеста Гумецкого. Другом особом выріжненом радом єст Ян Зых – поета і тлумач з Корчыны. Його іменом назвали сквер, на котрым находит ся тіж упамятняюча го таблиця і його памятник.

«Суботы з провідниками по Команчы» – о перлинах Команчы бесідуют експерты

Вакациі то час ріжных цікавых туристичных подій і проєктів. Єден з такых проєктів веденый єст на стыку Низкого Бесіду і Бєщадів. Ґмінный Осередок Культуры в Команчы просит до участи в подіі пн. «Суботы з провідниками по Команчы». Під опіком провідників др Йоанны Потачек і Артура Ґурецкого в кажду суботу липця і серпня мож буде видіти і познати історию перлин деревяной архітектуры з Команчы. Сут то м.ін. костел св. Осифа, грекокатолицка церков ци православна церков Опікы Божой Матери. Більше дрібниц найдете на фейсбуковым сайті Ґмінного Осередка Культуры в Команчы.

На саноцкым рынку зас стрітят ся ремісникы і выставці ікон

Ближыт ся саноцкій Ярмак Ікон. Подія посвячена єст головно іконам, але не лем. В проґрамі стрічы находат ся тіж ковальскы і горнчарскы варштаты, а окрем ікон мож буде купити локальны выробы. Тогорічна едиция подіі пройде 6. і 7. серпня/авґуста як все на саноцкым рынку. Як подают орґанізаторы, до той поры зголосило ся уж понад 100 выставців. Надіют єднак, же не єст то іщы конец, бо лишыло ся пару свобідных місц, де ремісникы можут запрезентувати свою творчіст. Охочы прошены сут о майьове або телефонічне зголошыня. Дрібниці найдете на фейсбуковым сайті подіі.

Єст уж нове выданя календаря «Лемківскы Церкви 2023»

Календар «Лемківскы Церкви 2023» Выдавництва Лібра ПЛ мал свою премєру вчера в часі авторской стрічы в Музею Лемківской Культуры в Зындрановій. На картах календаря находят ся церкви м.ін. з Команчы, Крампной, Ґладышова ци Святківкы. Авторами знимок сут Кристиян Ківач, Патрик Бєґаньскій, Кароль Нєнартович, Віктор Барон і знаный серед Лемків Петро Басалыґа.

«Світ під Кычером» по перерві

Припоминаме, же 1. липця/юлия зачала ся 25. едиция Фестівалю «Світ під Кычером». В проґрамі подіі находят ся выступы 14 ансамблів, в тым м.ін. з Панами, Чіле, Мексику, Украіны і Польщы. Колективы запрезентуют ся в селах находячых ся на Нижнім Шлеску і Любушскій Земли. Зато же єст то ювілейна едиция подіі, днес – 4. липця/юлия, на ліґницкым рынку одбуде ся торжественна ґаля, в часі котрой орґанізаторы фестівалю отримают цертифікат FIDAF – федерациі, котра лучыт найбарже престіжны фольковы фестівалі на світі. Деталі проґраму находят ся на офіцийным сайті подіі.

фот. Patryk Biegański