Сумар дня на 4. листопада/новембра 2022 р.

Приносиме вам сумар медияльной ґрупы ЛЕМ.фм+ на ден 4. листопада/новембра 2022 р.

Меншыновы выборы в Сербіі

В Сербіі рыхтуют ся на выборы, в котрых члены нацийональных меншын будут выберати членів Нацийональных совітів. Меншыновы выборы одбудут ся уж 13. листопада/новембра тр. Своі совіты буде выберало 19 нацийональных меншын, в тым Русины. Нацийональны совіты сут формом меншынового справуваня, до котрого кажда нацийональна меншына має подля сербской леґіслятивы право. Голосувати в тогорічных меншыновых выборах приголосило ся близко 455 тис. сербскых громадян. Русины в Сербіі свій Нацийональный совіт мают од 2002 рока, по выборах познаме уж шестый склад совіту. Моментально Русины мают право мати 19 членів совіту – чысло тото залежыт од чысла люди, котры ся голосят ґу даній нацийональній меншыні. Остане оно єднакє на дальшый функцийный період, кєд же даны з найновшого списуваня сут іщы рахуваны. Русины будут мочы выберати з пятьох списків. Задачом Нацийонального совіту єст представляти меншыну в обшыри освіты, культуры, інформуваня в меншыновым языку, хоснуваня і ґрафічного запису языка в урядовых справах, совіт бере участ в процесі рішаня або рішат в вопросах тых обшыри. Більше про меншыновы выборы в Сербіі найдете в дописі на нашым сайті.

Черговы «Шедевры русиньского кумшту» в Будапешті

12. листопада/новембра в Будапешті одбуде ся 5. річник подіі пн. «Шедевры русиньского кумшту». Подія пройде в Сали ґрифа Мигаля Естергазія в Каштели Штефанія. Орґанізаторами сут посланкыня Парляменту Мадяр за русиньску менышну Віра Ґіріц, Вседержавне Русиньскє Самосправуваня, Вседержавне Общество Русинів/Рутенів Мадяр, Общество Русиньской Культуры і Фундация «За Русинів». На подіі будут презентуваны ріжны обшыри русиньской культуры і штукы. Обзерати мож буде ювілейну выставу вызначного русиньского маляря Атаназа Фединця. Выступлят оперный співак Золтан Дараґов, Анна і Мария Бан, Молодіжный Фольклорный Ансамбль Русины і школярі мучоньской Грекокатолицкой основной школы св. Петра. Покровителями подіі сут заступця віцепремєр Мадяр Жолт Шемєн, председа парляментарной фракциі Християньско-демократичной народной партиі Іштван Шімічко і посланкыня Віра Ґіріц.

«Дзвінниці полны памяток» – проєкт зреализуваный Клюбом Любителів Лемковины

Клюб Любителів Лемковины реализувал в тым році проєкт пн. «Дзвінниці полны памяток», дофінансуваный з Нацийонального Інституту Спадковины, в рамках проґраму «Разом для спадковины». Результаты порядкуваня церковных дзвінниц переросли жаданя орґанізаторів. Выстава підсумовуюча діяня Клюбу Любителів Лемковины была запрезентувана в Креници, в православній церкви св. Владиміра. Вернісажови выставы товаришыли церковны співы.

В Креници явили ся новы паркінґовы місця

Уж в тым тыжни має ся в Креници завершыти ремонт улиці Косцюшкы, яка ся находит в самым центрі міста, близко дептака. Як подал бургомайстер Крениці Пьотр Рыба, окрем новой верхньой верствы і выміны енерґетичной і ґазвой сіти, буде там около 70 новых паркінґовых місц. Кошт інвестициі то понад 3 млн злотых, з чого половина походит з Урядового Фонду Розвитку Доріг. Як підкрислят бургомайстер Рыба, то чергова така інвестиция, бо протягом послідніх трьох років в Креници явило ся понад 150 новых паркінґовых місц. То тіж не конец дороговых інвестиций в курорті, якій в будучым році заінвестує 25 млн злотых з проґраму Польскій Лад, м.ін. в будову паркінґів на парусот місц ци ремонты важных улиц.