Сумар дня на 4. лютого/фебруара 2021 р.

Приносиме вам сумар медияльной ґрупы ЛЕМ.фм+ на ден 3. лютого/фебруара 2021 р.

Заохочаме чытати «Приповідкы на кажду пору рока»

Варшавскій Університет во спілпрацы зо Стоваришыньом «Руска Бурса» в Ґорлицях печатали книжку з оповіданями для наймолодшых. «Приповідкы на кажду пору рока» то збірка 28 історий, котры мают вчыти, розвивати вражливіст, уяву діти, а предовшыткым – вказуют они богатство русиньского языка, традиций і культуры. Сут то тексты, котры завдякы вельолітній роботі Петра Мурянкы были публикуваны скорше в інчых выданях – в «Голосі Ватры», «Бесіді» і «Лемківскій Ластівочці». До «Приповідок…» тексты зобрала і списала Варвара Дуць, яка вєдно з Анном Масляном одповідали і за редакцию. Выданя публикациі то част старань, жебы хоронити язык, то нарядя потрібне до того, жебы го вчыти, вказувати нашу лемківску культуру, а завдякы кольоровым ілюстрациям «Приповидкы…» заінтересуют аж і наймолодшых чытачів. На потребы домашньой і шкільной едукациі книжка є до одобраня, по скоршым контакті, в Рускій Бурсі в Ґорлицях.

Найвекша безробітніст в русиньскых реґіонах

Початком 2020 р. окрес Кежмарок належал до катеґориі окресів на Словациі, якы мали процент евідуваной безробітности высшый як 13 в рамках Пряшівского Самосправного Краю. В грудни/децембрі до того чысла долучыли і окресы Сабинів, Воронів над Топльом, Свидник, Меджелабірці і Бардиів. В марци 2020 р. пандемія коронавіруса спричынила скоре збільшыня ся безробітности в цілій Словациі. Медже першым і остатнім місяцьом минулого рока збільшыла ся евідувана безробітніст близко о 40%. Од липця/юлия до жолтня/октобра безробітніст в Пряшівскім Краю помалы ся знижувала, но в остатніх двох місяцях зас ся піднесла з великом скорістю. ПСК має єднако як перед пандемійом найвысшу безробітніст в рамках Словациі, на кінци рока на рівни 11,4%. Кєд ся посмотриме на окресы, де жыє векше русиньскє населіня, пак є на тым як раз найгірше Свидник, котрый має безробітніст на рівни 13,8%. Меджелабірці мают 13,6%, слідує окрес Бардиів з 13,4%. В окресі Стропків евідуют 12,1,%. Снина має 11-процентну безробітніст. Окрес Стара Любовня має 9, а Гуменне 8,4% безробітных.

Кычера ремонтує своє сідибу

Перед парома днями закінчыл ся дальшый етап будівляно-ремонтовых прац в сідибі Лемківского Ансамблю Пісні і Танця «Кычера» в Ліґници. Роботы были зреализуваны завдякы субвенциі Міністра Культуры і Нацийональной Спадковины. Зміцнено м.ін. структуру даху, мурувано новы комины та вымінено нп. рынвы. Роботы оцінены были на 330 тис. зл, з чого аж 325 тис. зл то як раз міністерияльна дотация. Перше завдякы дотациі Міністра Адміністрациі і Цифризациі ансамбль зробил земельны роботы, в тым ізоляцию будинку, поміняны были выгляды і замонтувана істаляция центального огріваня. Товды зрыхтувано тіж два поміщыня на потребы діяльности бібліотекы. В дальшых етапах має быти модернізация сходів, будова вінды та адаптация поєдных поміщынь. По ремонті обєкт має служыти на потребы ансамблю, в тым на орґанізацию вшелеякого рода культурыных подій.

Модернізация Музею Русиньской Культуры в Пряшові

Як інформує Словацкій Нацийональный Музей – Музей Русиньской Культуры в Пряшові, перед даякым часом зачал ся ремонт і пристосуваня просторів на партері музейного будинку. Роботы зачали ся 11. січня/януара того рока, а мают іх завершыти кінцьом марця. Першом з експозиций, котру хотіли бы вказати в русиньскым музею, мала бы быти выстава посвячена родині Дубайовых. Перед парома днями на портали YouTube вказал ся документальный фільм, котрый посвяченый єст діяльности Музею Русиньской Культуры в Пряшові. Про музей оповідат м.ін. Люба Кральова, його директорка. Фільм найдете так само на фейсбуковым фанпейджы той інституциі.