Сумар дня на 4. лютого/фебруара 2022 р.

Приносиме вам сумар медияльной ґрупы ЛЕМ.фм+ на ден 4. лютого/фебруара 2022 р.

Надзвычайне засіданя меншыновой страны СКУтНіЕМ

В неділю, 30. січня/януара тр., одбыло ся надзвычайне засіданя меншыновой страны Спільной Комісиі Уряду та Нацийональных і Етнічных Меншын. Было оно скликане в звязку з рішыньом Сойму о зменшыню о 39 мнл 800 тис зл. фінансовых середків на освітову част загальной субвенциі презначеной на вчыня меншынового і реґіонального языка в школах, та в звязку з запрезентуваныма на засіданю Комісиі Нацийональных і Етнічных Меншын Сойму 28. січня/януара тр. заповідями леґісляцийных змін тыкаючых вчыня німецкого як языка нацийональной меншыны. Присутны на стрічы члены репрезентуючы меншынову част комісиі высловили солідарніст з німецком меншыном перед обличом леґісляцийных змін, котры мали бы зменшыти вымір вчыня німецкого як языка меншыны з трьох годин тыжньово до лем єдной. Меншынова страна Комісиі підняла рішыня о конечности пильного скликаня надзвычайного засіданя Спільной Комісиі Уряду та Нацийональных і Етнічных Меншын як опінійодавчо-дорадчого орґану Председы Рады Міністрів. Проблем мал бы быти єдином темом того засіданя. Меншынова страна Комісиі хоче на засіданю познати становиско Уряду, а особливо дознати ся о способі введіня реченых рішынь, як тіж представити свою опінію на тоту тему.

Резолюция Европейского Парляменту в справі вызнаня шлезского як языка

Як поінформувал на своім фейсбуковым профіли европосланец Лукаш Когут, 27. січня/януара підписал і зложыл він резолюцию Европейского Парляменту в справі вызнаня шлезского як языка. Текст, якій єст актуально тлумаченый Парляментом, кличе Уряд і Парлямент Польской Республикы вызнати офіцийні шлезскій языком. Евродепутуваный кличе до помочы Европейску Комісию, кєд же «меншыновы і реґіональны языкы небудучы офіцийныма языками ЕУ, сут спільном дідовизном вшыткых громанян Европейской Уніі. За словами Когута, резолюция – перша в істориі – єст результатом дотеперішньой працы, але і проведеной спільно з проф. Малґожатом Мысьлівєц, проф. Адамом Боднаром і Щепаном Твардохом стрічы парляментарной інтерґрупы про шлезску достоменніст, язык і культуру. Европосланец буде в найблизшым часі брал участ в дальшых стрічах, якы мают помочы в офіцийным вызнаню шлезского як языка польскыма властями.

Нове лоґо орґанізациі молоды.Русины

Уж 13 років фунґує на Словациі орґанізация молоды.Русины. Як написали на своім фейсбуковым сайті, так як ся змінят і розвиват іх орґанізация, так рішыли змінити і єй лоґо, жебы было візуальні простійше, модернійше, а і легше до познаня медже знаками другых русиньскых орґанізаций. Про значыня нового лоґо мож чытати на сайті орґанізациі. Як пишут, іх задачом, задачом молодой ґенерациі єст єднати традицийне з новым і вказувати, же Русины не смотрят лем до минулости, але мают потенциял і волю быти частю модерной соспільности ХХІ столітя.

В горах фурт тяждкы условія до вандрівок

Працівникы Бєщадского Нацийонального Парку припоминают, же в горах фурт утримуют ся барз тяжкы условія до вандрівок. Курит сніг, шлякы сут слабо выдоптаны або выдоптаны лем на короткым одтинку, єст тіж слаба видочніст. Кажде сто метрів в такых условіях то для вандруючого великій труд. Працівникы заохочают забрати з особом ракєты або лыжы з камусом, як і термос з горячом гарбатом і мериндю. Рекомендуют не брати зо собом раків, котры в актуальных условіях сут лем додатковым обтяжыньом. Перед выходом в горы просят провірити актуальну хвилю і ступін лявіновой загорозы, та повідомити о прогульці Бєщадску Ґрупу GOPR.