Голосник

Сумар дня на 4. серпня/авґуста 2020 р.

Приносиме вам сумар медияльной ґрупы ЛЕМ.фм+ на ден 4. серпня/авґуста 2020 р.


Новы стратеґіі для рівности і інтеґрациі Ромів

Ведуча Европейской Комісиі Урсуля фон дер Ляйен закликала в неділю державы Европейского Союза, жебы зобовязали ся до заперестаня дискримінациі Ромів. 2. серпня/авґуста празднуваный был Европейскій Ден Памяти о Погоромі Ромів. В спільній заяві шефова ЕК, заступчыні ведучой ЕК до справ вартости і прозрачности Вера Йурова та унійна комісар дс. рівности Гелена Далі оддали пошану жертвам нацистскых злочынів, в тым єдному з послідніх вратуваных з перехідных таборів для французскых Ромів, Реймондови Ґурем, котрый вмер в маю т.р. маючы 94 рокы. Представничкы ЕК заапелювали, жебы заступити антиромксы поставы одкрытістю і акцептацийом, бесіду ненависти і злочыны – толеранцийом і пошануваньом чловечой гідности, брутальніст же – едукацийом про Голокавст. Закликали 27 держав Европейского Союза, жебы заанґажували ся сотвортити новы стратеґічны рамы Уніі для рівности і інтеґрациі Ромів в соспільствах, жебы осягнути соспільну рівніст, а тіж кажду інчу рівніст. Вчас ІІ світовой войны німецкы нацисты вымордували коло 500 тис. Ромів.

Рынок в Ґорлицях буде направляный

Місто Ґорлиці підписало договор в тырваючым процесі з выконавцьом ревіталізациі Старого Міста. Фірма зобовязала ся передати для міста суму 725 тис. зл. Додатково, як розрахуваня судовых коштів, на конто міста вплыне квота 47,5 тис. зл. Грошы будут цілістю переданы на змодернізуваня і поправу доріг в самым центрі міста. Два рокы тому місто заложыло судову справу властительови Будівляного Закладу Чеславови Шарек за неодповіднє выконаня робіт. Доказом была незалежна експертиза Краківской Політехнікы, яка вказує на блуды в технолоґіі і доборі материялів, вычыслят тіж проєктовы і выконавчы хыбы. По тырваючых двох роках медияциях підписано договор. Чысто перебудуваны будут два місецкы пляцы: Рынок і Двориско, вымагают цілковитой направы. Наново зроблена буде ул. Пєкарска, як тіж ходникы і переходы для пішых довкола Рынку. Улиці покрыют брукуваном кістком. Де треба, вымінят або узуполнят підбудову під ґранітовом кістком.

Панахіда за Богданом Ґамбальом

Перед місяцьом, 2. липця/юлия 2020 р., перестало бити серце Богдана Ґамбаля, вельолітнього ведучого Стоваришыня «Руска Бурса» в Ґорлицях, основателя і шефредактора радия ЛЕМ.фм, нашого приятеля. Просиме на спільну молитву за душу упокоєного 9. серпня/авґуста 2020 рока на 14.00 год. до села Чарна на Лемковині на місцевый цмонтір. Як раз, 10. серпня/авґуста, припадат 40 дни, коли вмер єден з найвызначнійшых сучасных Русинів, бл. п. Богдан Ґамбаль. Панихіда за вмерлым заплянувана є на ден скорше, в неділю 9. серпня/авґуста о 14.00 год. Знаме, што вельо з Вас не было в силі поіхати на похорон, котрый проходил в самій середині тыжня, 8. липця/юлия, аж на далекій Чужыні, зато на спільну молитву просиме тепер. Панихіда правлена буде при родинным памятнику родины Ґамбалів на цмонтери в селі Чарна, котре было близкє Богданови. Служыл буде о. Ярослав Чухта.

Новосільского акт до обзераня в Сопоті

Єдном з найціннійшых і найбарже ріжнорідных приватных польскых колекций штукы належыт до Кжыштофа Мусяла. Коли єй творця зачынал свій пут з польском штуком ХІХ, ХХ і ХХІ ст. ани сам не думал, як спектакулярна і велика буде то колекция. Серед авторів, котрых образів єст властительом, сут м.ін. Матейко, Выспяньскій, Мальчевскій, Бознаньска ци Новосільскій. 170 вырбаных обєктів з колекциі К. Мусяла буде мож видіти на выставі пн. «Кольоры перемін» од 14. серпня/авґуста до 22. листопада/новембра тр. Експозиция презентуваня буде в Державній Ґалериі Штукы в Сопоті. Обнимат захованы цільово більшы ґрупы творів поєдных артистів. То такы образы, в котрых найти мож спільны мотивы, з другой же страны вказуют на богатство можливых розвязань, стилистик ци емоций, якы товаришат малюваню портретів, мертвой природы ци фіґуральных композиций. Єдным з них буде образ Юрия Новосільского пн. «Лежачый акт на червеным фоні» з 1969 рока.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі