Сумар дня на 4. серпня/авґуста 2022 р.

Приносиме вам сумар медияльной ґрупы ЛЕМ.фм+ на ден 4. серпня/авґуста 2022 р.

Заран загорит 42. Лемківска Ватра

Уж заран в Михалові загорит 42. Лемківска Ватра, яка буде тырвала до неділі. В музичным проґрамі подіі будеме мочы видіти м.ін. такы ґрупы як Кычера, Терочка, Ластівочка, Надія, Coolбаба, Інтраде, Вороны, Ефір ци Секция Рапу. Але тогорічна Ватра буде і місцьом памяти о выгнаных в рамах Акциі «Вісла» і о жертвах комуністичного концентрацийного лаґру в Явожні. Запрошены гості, в тым представникы польскых власти положат квітя під памятныма таблицями. В суботу одбуде ся так само в специяльно зрыхтуваным шатрі дискусия посвячена наслідствам Акциі «Вісла», якы і днес одчувают Лемкы. Пройде і презентация лемкознавчых книжок до темы выселінь, презентация листів выселенців писаных до «Карпатской Руси», як і презентация карты Лемковины, яка образує ґеоґрафічну кількіст выгнаных. Будеме і мы з нашым шатром, в якым будете мочы придбати нашы книжкы і цедечка.

Внет стане деревяна церков в Ґладышові

Як інформує православна парохія св. Йоана Крестителя в Ґладышові, помалы завершат ся дальшый етап будовы новой церкви. Перед двома тыжнями головный выконавця деревяного храму зачал покля што в своій сідибі в Яслі пробні складати конструкцию церкви з великых швалів. Коли вшыткы елементы будут зрыхтуваны і зложены, пак конструкция буде в більшых елеметах перевезена на пляц до Ґладышова, де уж конечно храм буде вознесеный. Парохіяне надіют ся на добру хвилю, кєд же будова потырват парунадцет дни. Нова деревяна церков в Ґладышові будувана є подля перевістного проєкту неістнуючой уж церкви свв. Космы і Даміяна в Незнайовій. Ґладышівска парохія вєдно з будівляным комітетом звертают ся з просьбом о дальшу підпору будовы той лемківской церкви.

Ремонт мосту пред Ізбами

Повітовый Заряд Доріг в Ґорлицях інформує, што 10. серпня/авґуста зачне ся ремонт мосту на ріці Біла, якій веде до Ізб од строны Баниці і Снітниці. В звязку з тым буде введена часова зміна орґанізациі руху в Баници. Обізд для жытелів Ізб буде вюл через Баницю – тыкало то буде авт о масі до 2,5 тоны. Деревяный міст на Білій находит ся вздолж повітовой дорогы 1503 K Фльоринка – Ізбы. Покля што не знатя, кілько потырват модернізация обєкту. До самых Ізб все вели дві дорогы – од Баниці через центр села і од крижівкы од Баниці і Снітниці. Деревяный міст вымагал скорого ремонту, кєд же дощкы зачали од него одходити.

«Бесіда» – свіжа і доступна

Хвилю пред ближучом ся 42. Лемківском Ватром на Чужыні явил ся дальшый номер часопису Стоваришыня Лемків – «Бесіда», ч. 4 (187) за місяці липец/серпен 2022 р. В посліднім выданю прочытаме м.ін. статі Петра Медвідя, Демка Трохановского, Северияна Косовского, Андрия Ковальского, Петра Трохановского і Наталиі Малецкой-Новак. В звязку з річницьом Акциі «Вісла» нашли ся тіж спомины покійного Михала Олеснєвича і текст Ірины Савкы. В «Бесіді» найдете тіж спис подій за остатні два місяці. В части «Одышли од нас/Попращали мы» чытати можеме пращальны слова о бл. п. Алойзи Цабалі, досліднику ікон і спілоснователю сандецкого скансену, і бл. п. Юстині Шыманьскій, жытьовій товаришці Андрия Копчы.