Сумар дня на 4. січня/януара 2023 р.

Приносиме вам сумар медияльной ґрупы ЛЕМ.фм+ на ден 4. січня/януара 2023 р.

Музей Лемківской Культуры в Зындрановій є часово запертый

Музей Лемківской Культуры в Зындрановій од 1. січня/януара до 31. марця є запертый для туристів. Як подає ведучый Товариства для Розвитку Музею Лемківской Культуры, Богдан Ґоч, директор музею, причыном є зменшена дотация на фунґуваня інституциі признана Міністром Внутрішніх Справ і Адміністрациі. Дофінансуваня підметовой діяльности Музею было поменшене о 30% порівнуючы до минулого рока, а дофінансуваня на цільовы задачы – аж о 50%. Як подає дале Богдан Ґоч – інфляция, звекшыня мінімального вынагороджыня, збільшыня цін товарів ітд. спричынят, же при отриманых од Міністра фуднушах інституция не єст в силі утримати ся без цілый рік. О проблемах музею Богдан Ґоч на біжучо інформувал представників лемківской меншыны в Спільній Комісиі Уряду та Нацийональных і Етнічных Меншын. Ведучый інституциі надіє ся, што на сезон поведе ся взновити діяльніст музею.

Жолобанич зас найліпшый

В пятницю 30. грудня/децембра 2022 р. в просторах Інституту Русиньского Языка і Культуры Пряшівского Університету прошол семінар, на котрым были оголошены результаты девятой едициі Літературного Конкурсу Мариі Мальцовской. Своі поетичны і прозаторскы творы до оціны переслало шестьох авторів. Третє місце заняла Мария Шмайдова з пригодами для наймолодшых пн. «Під диков грушков». Другє місце заняла Людмила Шандальова з творами в жанрі інтимной поезиі. Найліпшым твором загнаным до девятой едициі Літературного Конкурсу Мариі Мальцовской остала гумористична проза Мирослава Жолобанича пн. «Піняженка». Писменник єст тіж автором пятьох інчых публикаций та двакратным лавреатом Літературного Конкурсу Мариі Мальцовской – першый раз выріжненый был в 2020 році.

Ґенеральна Дирекция Доріг і Автострад підсумувала 2022 рік

Підкарпатскє воєвідство уж є получене дорогом S19 з Люблином і буде мало другу експресову дорогу. Ґенеральна Дирекция Доріг і Автострад підсумувала 2022 рік, подаючы, што в минулым році оддали послідні бракуючы одтинкы експресовой дорогы S19 медже Ряшовом а Люблином, перебудували Державну Дорогу 28 Перемышль-Медика, та зачали робити при S19 на полудне од Ряшова. На етапі реализациі в системі проєктуй і будуй єст шіст одтинків, м.ін. Місце Пястове-Дукля ци Дукля-Барвінок. На етапі рыхтуваня єст іщы друга експресова дорога для підкарпатского воєвідства. То дорога S74 на одтинку Опатів-Ниско. А в наблизшых роках на обшыри воєвідства мают побудувати вісем обводниц. Роботы над нима уж ся зачали, але іщы не в терені – то етап рыхтуваня документациі.

Уж мож і самому наварити як в бабы!

Кінцьом рока Стоваришыня «Руска Бурса» в Ґорлицях оддало в рукы чытачів першу так обшырну лемкіску кухарску книжку. Публикация чыслит 176 стран і поділена є на 11 части: стравы з мукы, капусты, молочны стравы, стравы з комперями, зо сыра і жентиці, з яєц, додаткы, стравы з ярин, грибів і приправ, стравы з мяса, велийны та окремо великодні стравы. Рaзом веце як 100 ориґінальных рецептур на типовы для довыселенчой кухні стравы, рыхтуваны згідні з тым, як Лемкы колиси варили і што мали доступне. Збераньом, вынаходжыньом та редакцийом рецептур заняла ся Олена Дуць. Тото, што найдете в публикациі, то лем част того, як іли нашы предкы. Рецептуры хочеме громадити дальше та дополнити зміст публикациі при наступных выданях той книжкы. Апелюєме присылати рецептуры на адрес olena@lem.fm. Публикация є триязычна – найдете в ній рецептуры по лемківскы та в тлумачыню на польскій і анґлицкій языкы. Мож єй купити через склеп на сайті lem.fm.