Сумар дня на 4. січня/януара 2024 р.

Приносиме вам сумар медияльной ґрупы ЛЕМ.фм+ на ден 4. січня/януара 2024 р.

Остаточны результаты Нацийонального Повселюдного Спису

Головный Статистичный Уряд (ГСУ) вкінци скінчыл рахувати… Нацийональне ПовселюднеСписуваня проходило в 2021 р., а фінальны результаты познали сме аж тепер – кінцьом 2023 р. Згідно з комунікатом ГСУ – теперішні даны сут уж остаточны. ГСУ оприлюднил дві додатковы табелі, котры детальнійше вказуют нам на нацийонально-языкову структуру Польщы. Доданы были даны нацийонально-етнічной приналежности для цілой державы і поєдных територияльных єдиниц – воєвідств, повітів і ґмін. Тепер можеме познати і даны тыкаючы языка домашніх контактів – так само в примірі єдиниц. Самособом інтересуют нас даны з повітів і ґмін для лемківской нацийональности. Так приміром знаме, што в Ліґници жыє 756 Лемків, в ґміні Устя Рускє 531, в місцевости Рудна 395, а в самій Зеленій Горі 332. Што цікаве, окрем 13 607 осіб, якы подали свою лемківску приналежніст, аж 647 осіб подало, што сут русиньской нацийональности. Подібні є в примірі языка.

Вчыня німецкого языка буде по старому

Од 1. вересня/септембра того рока ученикы з німецкой меншыны зас будут мочы вчыти ся свого рідного языка в такым самым годиновым вымірі як діти і молодіж з інчых меншын. Теперішнє Міністерство Нацийональной Едукациі хоче привернути принципы, котры змінил попередній міністер Пшемыслав Чарнек. Товды німецка меншына почула ся (правильно) дискримінувана МНЕ. Зміны в переписах заповіла іщы в минулым тыжни віцеміністер едукациі Йоанна Муха. Уряд влады Матеуша Моравєцкого зменшыл вымір годин для німецкой меншыны з 3 до 1 лекциі на тыжден. Зміна тыкат близко 53 тис. учеників в близко 600 школах, якы находят ся на обшырях 164 самоурядів.

Лемківскій Стипендийный Фонд ім. Русенка спер єдну студентку

Завдякы Стоваришыню Любителів Села Рогы, Фундациі МонМонде, Товариству для Розвитку Музею Лемківской Культуры в Зындрановій, Стоваришыню Стріча Рыманів і Едукацийной Фундациі Підприємства з Лодзи дальшых сім стипендий трафило до молодежы, котра зачала студиі в академіцкых осередках. Того рока до стипендияльного проєкту долучыл Музей Лемківской Культуры в Зындрановій, якій веде Лемківскій Стипендийный Фонд ім. Івана Русенка. Лемківскій Музей признал стипендию для єдной молодой студенткы. Студенты будут отримувати по 700 зл місячні. Цертифікат стипендиі стипендистці вручыл особисто ведучый зындранівского Музею, Богдан Ґоч.

Глядают лавників в ліґницкым округу

Як інформує ґміна Польковиці, ліґницкій Округовый Суд глядат трьох засідателів, якы будут полнити фунцию в складах судів працы в каденциі 2024-2027. Зголошыня кандидатів на засідателів будут приниманы до 17. січня/януара, а пак вчас найблизшой сесиі Містецкой Рады одбудут ся речены дополнюючы выборы засідателів. Зголошыня кандидатів мож подавати до Бюра Містецкой Рады Польковиц. Засідателі сут частю судовых складів і репрезентуют тзв. соспільный фактор в судах.