Сумар дня на 5. червця/юнія 2023 р.

Приносиме вам сумар медияльной ґрупы ЛЕМ.фм+ на ден 5. червця/юнія 2023 р.

Соймова Комісия Нацийональных і Етнічных Меншын в православній парохіі в Щеціні – бесідувана і ситуация лемківской меншыны

В понедільок 29. мая в Рыцарскій Сали Воєвідского Уряду в Щеціні одбыло ся выіздове засіданя Соймовой Комісиі Нацийональных і Етнічных Меншын в західньопоморскым воєвідстві. Бесідуваны были ситуация і проблемы нацийональных і етнічных меншын жыючых в воєвідстві. Окрем членів Комісиі на стрічу были запрошены представникы меншын, м.ін. лемківской, грецкой, украіньской, ромской, жыдівской і ормяньской. Лемківску меншыну репрезентувал на стрічы о. Павел Стефановскій, парох православной парохіі св. Миколая в Щеціні. На просьбу членів Комісиі уж по офіцийным засіданю в Західньопоморскым Воєвідскым Уряді одбыла ся стріча в православній парохіі в Щеціні. На стрічы была присутна і Полномічна Воєводы дс. нацийональных меншын в західньопоморскым воєвідстві. Підчас стрічы была м.ін. порушена тема помочы біженцям з Украіны. Бесідувана была і ситуация лемківской і грецкой меншын в Польщы. Посланці мали і нагоду попрібувати кухню локальных меншын, м.ін. лемківску кєселицю. Як повіла для медий ведуча Соймовой Комісиі Нацийональных і Етнічных Меншын, посланкыня Ванда Новіцка, «виділи, як на західнім Помори фурт Лемкы сильно сперают Украінців». Дальше Комісия візитувала любушскє воєвідство, де жыє много нацийональных і етнічных меншын, в тым і лемківска.

Кличеме на соспільны консультациі – першы уж в тоту середу

Уж в тоту середу, 7. червця/юнія пройдут першы соспільны консультациі в справі вписаня на Державный Спис Нематерияльной Культурной Спадковины лемківского языка і лемківской культуры. Перша стріча одбуде ся в Ліґници о год. 18.30 в Collegium Witelona. Друга стріча пройде в суботу 1. липця/юлия о 15.00 год. в нашій Рускій Бурсі в Ґорлицях. Консультациі сут одкрыты для вшыткых Лемків, котры ідентифікуют ся з лемківскым языком і лемківском культуром. Просят на них Стоваришыня «Руска Бурса» в Ґорлицях і Стоваришыня Лемків.

Авторскы стрічы з проф. Павлом Робертом Маґочійом

Уж заран, 6. червця/юнія пройде перша з двох авторскых стріч з проф. Павлом Робертом Маґочійом, автором публикациі «Pod osłoną gór. Dzieje Rusi Karpackiej i Karpatorusinów». Стріча одбуде ся в Інституті Істориі Штукы Вроцлавского Університету. Початок о 18.00 год. Друга стріча, орґанізувана Стоваришыньом Лемків одбуде ся ден пізнійше, в середу 7. червця/юнія в Collegium Witelona в Ліґници, о год. 16.30. Близко 600-страницьова публикация, печатана влони выдавництвом Лібра PL, є досправдовым компендиюм знаня о Русинах. Тридцет розділів укладат ся в хронолоґічный порядок од преісторичных часів по сучасніст, в котрых Карпатска Русь осаджена є в шыршым контексті держав, якы рядили на єй обшыри. Польскоязычна версия книжкы є третьом, при ориґіналі по анґлицкы і тлумачыню на словацкій язык.

Інтеґрацийный Пікнік в Рускій Бурсі в Ґорлицях

В минулу суботу в просторах нашой Руской Бурсы в Ґорлицях одбыл ся Інтеґрацийный Пікнік з нагоды Дня Дітины. Стріча зачала ся од показовой пробы молодшoй ґрупы ансамблю Терочка, пак были спільны забавы і огниско. Пікнік был зорґанізуваный завдякы дотациі Міністра Внутрішніх Справ і Адміністрациі. Фотореляцию зо стрічы можете обзерати на нашым портали.