Сумар дня на 5. грудня/децембра 2023 р.

Приносиме вам сумар медияльной ґрупы ЛЕМ.фм+ на ден 5. грудня/децембра 2023 р.

Поміч при одбудові хыжы Трохановскых

28. листопада/новембра в родинній хыжы Штефаніі і Ярослава Трохановскых явил ся оген. В результаті скорой протиогновой акциі повело ся сохранити будинок перед цілковитым знищыньом, єднак помішыня в середині не надают ся до еґзистуваня. Найбільше потерпіла част, в котрій жыл і творил Маестро Ярослав Трохановскій. Проведіня ремонтовых прац і приверніня хыжы до хоснуваня вяже ся з великыма коштами. Зато на сайті zrzutka.pl вказала ся акция соспільной колекты на поміч при выремонтуваню хыжы родины Трохановскых. Грошы дозволят на найпильнійшы працы: на выміну електричной істаляциі і части выглядів. Пак зачне ся дальша част робіт, в рамках котрых треба достосувати поміщыня до жытя, так штобы родина Трохановскых могла як найскорше вернути до нормальности. Каждый, хто має охоту підперти Маестра і його родину, може то зробити через сайт zrzutka.pl 

Многє чысло істориків, журналистів і люди культуры не згаджат ся з рішыньом ІНП в справі Акциі «Вісла»

Як 28. листопада/новембра поінформувал Інститут Нацийональной Памяти, слідство в справі рішыня о проведіню Акциі «Вісла» было піддане ремісиі, значыт прокуратор Комісиі Гоніня Злочынів проти Польскому Народови в Ряшові не виділ основ потвердити, же выселіня Лемків і Украінців было злочыном проти людства ани комуністичным злочыном. Против в справі такого рішыня вказує парудесятьох істориків, журналистів, соспільных діячів і люди культуры, котры направили отвореный лист до маршалка польского сойму Шымона Головні і маршалок сенату Малґожаты Кідавы-Блоньской. В писмі рішучо осуджают рішыня ІНП і його обґрунтуваня. Авторы листу підкрисляют, што в часі слідства ІНП не взял до увагы досліджынь польскых і украіньскых істориків, а представлены в поясніню рішыня інфорамциі не сут згідны з історичном правдом. Думкодавці листу надіют, што представникы власти підоймут діяня, котры єднозначні оцінят злочынный характер акциі «Вісла», як і скандаличне рішыня ІНП.

Миколайовый Благодійный Біг в Польковицях

В Польковицях прошла сема едиция Миколайового Благодійного Бігу. Цілю акциі єст підперти найвірнійшых приятелів чловека – псів, котры особливо при зимовій погоді потрібуют помочы. Задачом участників было принести даякій дарунок для звірят, корму, коцы ци чачка. Пак зобраны річы сут передаваны до єдной з пляцівок або фундациі – того рока єст то фундация Life Code, котра діє в Польковицях і Любіні. Траса подіі вела од леккоатлетичного стадіону через улиці міста. Бігаючы в миколайковых шапках заохочали жытелів міста взяти участ в акциі в будучым році або уж тепер на власну руку підперти звірята в притулкх. Як передал єден з орґанізаторів, каждого рока участників акциі ся збільшат, а подія помалы стає ся традицийом міста.

Авторска стріча з доктором Квоком про його найновшу публикацию о Войвонині

В четвер 7. грудня/децембра в Заводі за Культуру Войводиньскых Русинів в Новым Саді пройде презентация книжкы авторства дра Томы Квокы «Wojwodina i jej Rusini: O języku, kulturze i historii Rusinów wojwodińskich». Подія зачне ся о 18.00 год. В часі стрічы участникы будут мочы послухати о найновшій публикациі Квокы, котра вказала ся в сотну річницю початку стандаризациі русиньского языка в Войводині. Книжка вказує найважнійшы аспекты тырваня і продолжаня русиньской культуры в Войводині.