Сумар дня на 5. лютого/фебруара 2024 р.

Приносиме вам сумар медияльной ґрупы ЛЕМ.фм+ на ден 5. лютого/фебруара 2024 р.

МВСіА обіцює діяти для творіня доброго права для меншын

Як поінформувал Віцеміністер Внутрішніх Справ і Адміністрациі Томаш Шыманьскій, в минулый четвер 1. лютого/фебруара стрітил ся зо Спілведучым Спільной Комісиі Ураду та Нацийональных і Етнічных меншын др Григорийом Куприяновичом. Як подал, порушыли вельо важных проблемів звязаных з утриманьом культурной дідовизны нацийональных, етнічных і языковых меншын та захованом іх прав. За словами віцеміністра, Польща єст сильна свойом ріжнорідністю, зато як Міністерство Внутрішніх Справ і Адміністрациі одповідальне за тоту обшыр адміністрациі, будут діяти для творіня доброго права, підкрисляючого важніст тых социяльных ґруп. Як дале припомнул віцеміністер, під конец січня/януара Гражданьска Коаліция зложыла в Соймі проєкт закону вызнаючого шлезскій язык як реґіональный, в котрым передвиджено в буджеті 2 млн злотых на прирыхтуваня вчыня шлезского в школах.

Пряшівска архієпархія отримала середкы на направу наслідств землетрясіня

Братиславска римокатолицка архієпархія фінансово помогла грекокатолицкій Пряшівскій архієпархіі по землетрясіню. Як поінформувала Пресова канцелярия Конференциі єпископів Словациі, в рамках традицийной Святомартиньской добродительской збіркы, повело ся в 2023 році вызберати рекордовых 185 518 евро. За словами братиславского римокатолицького архієпископа митрополиты Станіслава Зволеньского, архієпархія вырішыла підпорити грошами тых, котры потерпіли в минулым році од землетрясіня на східній Словациі. Половина середків іде про Кошыцку римокатолицку архієпархію, а друга про Пряшівску грекокатолицку архієпархію. Грошы підут предовшыткым на направы римокатолицкых і грекокатолицкых храмів в селах Янковці, Нижня Ситниця, Корункова, Сопківці і Пакостів. Веце на тоту тему найдете в дописі на нашым портали.

«Церкви і іконы Лемковины» Книжком Рока 2023

Як поінформувало выдавництво Libra PL в віторок 30. січня/януара в Музею Палацу в Вілянові одбыло ся торжественне вручыня нагорід Головного Заряду Стоваришыня Консерваторів Забытків, з участю Секретар Стану в Міністерстві Культуры і Нацийональной Спадковины, Ґенеральной Консерватор Забытків Божены Желязовской та Председы Головного Заряду Стоваришыня Консерваторів Забытків Яцка Рулевича. Як подало выдавництво, моноґрафія Ярослава Ґемзы пн. «Церкви і іконы Лемковины» (ІІІ выданя з 2023 р., поправлене і дополнене) отримала нагороду для выріжняючых ся науковых публикаций Книжка Рока 2023. Ґратулюєме!

«Святочна пачка для псика і котика»

В Польковицях завершыла ся третя едиция благодійной акциі «Святочна пачка для псика і котика». Жытелі ґміны зареаґували на акцию барз позитивно, завдякы чому повело ся назберати великє чысло ідла і інчых потрібных річы, котры служыти будут выбраній фундациі до опікы над бідныма звірятами. Дальша едиция акциі рушыт в грудни/децембрі тр.

ПУЛьС глядат новых членів

ПУЛьС, єдиный в світі професийный русиньскій ансамбль, выголосил конкурс на позицию члена/членкыні танцювальной ґрупы, котрый пройде в пятницю 1. марця в Театрі Йонаша Заборского в Пряшові. ПУЛьС просит на конкурс членів фольклорных ансамблів, абсольвентів і будучых абсольвентів выділу танця консерваториі і дальшых, котры бы радо змінили свою пасию в роботу, што буде ім давала радіст і сполніня. Інформуют і о можности підписаня догваріня о працу в часі студий в высшый школі.