Сумар дня на 5. марця 2024 р.

Приносиме вам сумар медияльной ґрупы ЛЕМ.фм+ на ден 5. марця 2024 р.

Вмер Вільям Джула – лемківскій етноґраф та фольклориста

В США помер лемківскій етноґраф та фольклориста Вільям Джула. Інформацию о його смерти передала Віра Дудра, директорка музею «Лемківскє село» в Монастирысках, тернопільска област, котрому Джула подарувал свою колекцию традицийных лемківскых облечынь. Од осмох років бесідувал Джула з директорком інституциі о переданю експонатів до музею. При транспорті експозициі помагал приятель Джулы, він тіж оплатил коштовну доставу через океан. В колекциі находят ся цінны лемківскы облечыня і біжутерия одвзорувана з особливом докладністю. Як підкрислила Дудра, музею не было бы стати на реконструкцию такых облечынь, тым барже доціняют подарунок. Директорка в комунікаті вказала на одданя Вільяма Джулы і вклад в підтримуваня лемківской культуры.

Зачала ся «Акция жаба»

Маґурскій Нацийональный Парк розставил забезпечаючы сіткы вздолж доріг в Фолюшы і Новым Змигороді. Сіткы мают хоронити земновоных перед розіханьом через авта. В тым році зо взгляду на высоку температуру жабы і інчы земноводны з Низкого Бескіду закінчыли зимовый летарґ аж місяц скорше як в попереднім році. Скорша міґрация земноводных зачудувала самых працівників парку, котры мусіли скоро реаґувати і забезпечыти дороговы переходы. «Акция жаба» окрем безпечного переношыня міґруючых земноводных на другу сторону дорогы дає можливіст природникам стислый моніторінґ популяциі в Парку – чысло жаб і іх стан здоровля. Як передал герпетолоґ з Маґурского Нацийонального Парку, з року на рік чысло земноводных впадат, діє ся так не лем в Низкым Бескіді, але в цілій Польщы. На зменшаня ся популяциі земноводных особливо злияют зміны климату, осушаня обшыри, але тіж і хвороты. Того типу акциі, де хоцкі кус мож мінімализувати смертельніст загороженых ґатунків, сут барз важны. Власти парку звертают ся тіж з апельом до шоферів осторожно іздити і звертати увагу на міґруючы земноводны.

Польковиці для спорту

Місто Польковиці протягом остатніх 4 років переказало 46 млн зл на футболь, жіночу кошыківку та мініфутболь – то сут найбільшы бенефіциєнты середків на спорт в остатніх роках. На наступным місци находят ся кікбоксінґ, тяжка атлетика ци біциґльовый спорт. Як підкрислил бургомайстер міста, Лукаш Пузнєцкій, діянь звязаны з підтримком польковицкого спорту протягом остатніх штырьох років был барз вельо – по підсумуваню самоуряд на спорт перезначыл понад 50 млн зл. Дотациі тыкали ґруп так дорослых, як і дітячых. Бургомайстер подал, што о квоті дотациі рішают радны, а середкы переказуваны сут для ріжных дисциплін на основі конкурсів. Бенефіциєнты дотациі мусят в транспарентный спосіб вказати своі выдаткы, што ґарантує, же переданы середкы сут хоснуваны в одповідній спосіб.

Музей Лемківской Культуры в Зындрановій глядат провідника

Музей Лемківской Культуры в Зындрановій оголосил набір на становиско музейного провідника. Власти інституциі оферуют умову на період од 1. квітня/апріля до 31. грудня/децембра 2024 рока з можливістю продолжыти на наступный рік. Зголошувати своє CV особливо прошены сут особы зазнаємлены з історийом і культуром Лемків і Лемковины. Додатковым атутом буде знаня лемківского язика, єднак не єст то конечне. Зголошыня мож пересылаты до 25. марця, контактовы даны і вшыткы дрібниці находят ся на інтернетовым сайті Музею Лемківской Культуры в Зындрановій.