Сумар дня на 5. серпня/авґуста 2021 р.

Приносиме вам сумар медияльной ґрупы ЛЕМ.фм+ на ден 5. серпня/авґуста 2021 р.

Нова «Бесіда» – чытайте

В передден 41. Лемківской Ватры на Чужыні явил ся друком дальшый номер часопису Стоваришыня Лемків – «Бесіда», ч. 4 (181) за місяці липец/серпен 2021 р. Чысло, подібні як два попередні, припоминат нам о тырваючым Нацийональным Повселюдным Списі. В тым выданю прочытаме м.ін. статі Олены Дуць-Файфер, Северияна Косовского, Петра Трохановского ци Богдана Горбаля. Окрем спомненых дописів, прочытати можеме польскоязычный допис про мураль во Фльоринці і особу покійного Михала Романяка, долголітнього жытеля села Михалів на выгнаню. В часописі нашли ся тіж біоґрамы членів нового Головного Заряду СЛ, кєд же початком липця/юлия одбыл ся ІХ Конґрес той орґанізациі.

Ювілей в Креници

25. липця/юлия был важным дньом для креницкой православной церкви. В тот ден вірны святкували ювілей 40. річниці одроджыня місцевой парохіі св. Владиміра Великого. Так само в тот ден молитовно споминано в пяту річницю смерти на бл. п. владыку Адама (Дубеца). Богослужыня очелял архієпископ Паісий, перемышльско-ґорлицкій єпарха. По літургіі были возношены молитвы за владыку Адама, помершых жертводавців креницкой парохіі, як тіж жертвы лаґру в Талергофі, Явожні і выселеных в акциі «Вісла». Владыка одзначыл медалями св. Максима Ґорлицкого заслуженых прихожан: місцевого дяка Петра Трохановского і Анну Пеляк та Мелянію Климківску.

Ніт винуватого за пожар церкви в Празі

Чешска Поліция не нашла виноватого за пожар, котрый 28. жолтня/ октобра 2020 р. знищыл русиньску деревяну церков св. Михала Архістратига в Празі. Деревяна церков, котра была народном культурном памятком з ХVII ст., стояла в Загороді Кіньскых в Празі і в остатніх роках служыла православній церкви. Власти Прагы вырішыли, же церков буде реконструувана. Подля представників маґістрату велику част храму буде мож оправити, з того, што ся лишыло. Церков походит зо села Великы Лучкы на Підкарпатскій Руси. До Прагы была перенесена в 1929 р.

Освячыня храму в Выраві

В неділю, 1. серпня/авґуста, пряшівскій грекокатолицкій архієпископ і митрополита Йоан Бабяк посвятил в селі Вырава на Пряшівскій Руси одновлену церков Успіня Пресвятой Богородиці, котра была выбудувана в 1863 р. і є Нацийональном Культурном Памятком. Торжество посвячыня одновленого храму было єдночасно і одпустом. По посвячыню церкви владыка Йоан одслужыл архієрейску літургію, котру вєдно з ним одправлял меджелабірскій протопресвитер Йоан Блашко і дальшы священникы, якы попередньо служыли на парохіі. Вырава є дочырньом церквю парохіі в Светлицях.