Сумар дня на 5. січня/януара 2023 р.

Приносиме вам сумар медияльной ґрупы ЛЕМ.фм+ на ден 5. січня/януара 2023 р.

Новы проєкты і подіі лемківскых орґанізаций

Початок рока то добра нагода, жебы призріти ся выбраным новым ініциятивам, што нас ждут в нашым лемківскым світі в Польщы в 2023 р. Стоваришыня Лемків зреализує проєкт під назвом «Центр літературной і медияльной інформациі та екомузей лемківской етнічной меншыны». Зорґанізуваный буде і «Лемківскій Вертеп». ЛАПіТ «Ластівочка» выдаст нову платню «Заспівали Ластівочкы». Орґанізация выдрукує і другє выданя споминів авторства Кірила Бреаня пн. «Моя долга ІІ світова война». Серед публикаций Стоваришыня «Руска Бурса» в Ґорлицях находит ся выданя збіркы посвяченой сучасній ліриці лемківского/русиньского універсум та печатаня в рамках сериі Бібліотекы Руской Бурсы третьой части байок під назвом «Горошок Бобошок». Музей Лемківской Культуры в Зындрановій хоче зорґанізувати артистичный пленер «На Лемковині» та выдати книжку посвячену пісням і співанкам од Святковы Великой. ЛАПіТ «Кычера» має в пляні печатати м.ін. другу част опрацуваня посвяченого кореспонденциі Лемків до ЗША, Канады і Уруґваю в роках 1947-1948. Серед новых проєктів Стоваришыня «Лемко Тавер» явило ся выданя публикациі під назвом «Фай по свому – дознай ся, выраз себе, подай дале».

Посвячыня одновленой ґорлицкой церкви

31. грудня/децембра, по проведеным ремонті, одбыло ся посвячыня ґорлицкой православной катедры Св. Тройці. Чын освячыня храму і престола очелил місцевый владыка Паісий, архієпископ перемышльско-ґорлицкій. Вчас першой літургіі в одновленій церкви вознесено молитвы за жертводавців і будівничых ґорлицкого храму, в тым за бл. п. владыку Адама, а тіж вшыткых покійных прихожан. Молитвы возношено за мир на Украіні і жертвы акциі «Вісла». Владыка Паісий подякувал вшыткым, котры в остатніх роках причынили ся до окрашыня ґорлицкой катедры. Подякуваня были переданы і в сторону о. Василия Ґалчыка, якій перед роками был будівничым храму, та для теперішнього настоятеля, о. Романа Дубеца. Ґорлицка церков была вознесена роках 1986-1991.

Выстава памяток по Новосільскым

В рамках проєкту «Видок на Краківян» на постійній выставі «Краків од початку, без кінця» в Палаци Кшытофоры запрезентуваны будут памяткы по Юрию Новосільскым. Выстава буде доступна од 11. січня/януара. Припомнийме, што Сойм Польской Республикы свхалил 2023 рік Роком Юрия Новосільского. Як раз в найблизшу суботу, 7. січня/януара выпадат рівно 100. річниця народжыня артисты. На краківскій выставі, окрем памяток, буде выставленый і єден з автопортетів Новосільского. Обєкты вказуваны на подіі были удоступнены Фундацийом Новосільскых, діючом при Ґалериі Стармах, де 17. січня/януара одбуде ся одкрытя выставы пн. «Працовня Юрия Новосільского».

Христос ся Раждає!

А на конец днешніх новин хочеме передати святочны желаня вшыткым празднуючым Різдво за юлияньскым календарьом. Приймийте од цілого ансамблю радия і порталю ЛЕМ.фм святочны вічнуваня доброты, щедроты, здоровля і миру та вшыткого, чого лем ждете в Новым 2023 Році. Хоче ся желати і того, жебы тоты нашы святкуваня были прикрашены хоц капинком снігу і морозу – віриме, што Лемковина в тым часі окрыє ся на біло. Святкуйте так, як нас того навчыли нашы діды! Од заране в нашым радию в рамках святочного ґрафіку высыланя будеме мочы чути желаня од цілой нашой команды. Христос ся Раждає!