Сумар дня на 5. жолтня/октобра 2022 р.

Приносиме вам сумар медияльной ґрупы ЛЕМ.фм+ на ден 5. жолтня/октобра 2022 р.

До кінця жолтня/октобра скінчыт ся ремонт дорогы в Высовій

В понедільок, 3. жолтня/октобра, ґорлицкій староста Мария Ґубала вєдно з віцестаростом Станіславом Кашыком підписали догваріня на перебудову дорогы в Высовій в рамках задачы пн. «Перебудова повітовой дорогы 1498К Ропа-Высова-Бліхнарка-Границя Державы». В рамках інвестициі на фраґменті дорогы в Высовій поправлят рівніст і герметичніст той же, упорядкуют побоча, а тото безпосередньо влине на поправу безпекы єй хоснувателів. Вартіст задачы то близко 3 млн зл, з чого близко 2 145 тис. то вклад Державных Лісів, близко 530 тис. походит з резервы буджету державы, а вклад повіту то 326 тис. зл. Ґміна Устя Рускє поносит кошты звязаны з будовляным проєктом. Плянуваный термін закінчыня робіт то 31. жолтня/октобра тр.

Розбудова біциґльовых получынь Мідьового Роверового Пути

Тырват будова біциґльового получыня з Польковиц до Ґрембоціц, а неодолга до той інвестициі долучыт наступна. Власти польковицкого повіту підписали догваріня на будову біциґльовой стежкы з Польковиц до Сєрошовиц в ґміні Радваниці. Інвестицию заплянували в рамках Мідьового Роверового Пути, котрый в ефекті получыт пару повітів на обшыри Мідьового Басену. Є то інфраструктура, котрой од років бракувало в реґіоні. Лідером цілого проєкту є польковицкій повіт. Догваріня на побудуваня стежкы з Польковиц до Сєрошовиц обнимат одтинок долгости 5,5 км. Цілый Мідьовый Роверовый Пут буде чыслил коло 300 км біциґльовых стежок для роверів повітів: польковицкого, ґлоґівского, любіньского і ліґницкого. В проєкт заанґажуваных єст 19 саморуядів.

В місце Економічного Форум в Креници – Крениця Форум

Малопольща буде місцьом новой конференциі – уж 19.-21. жолтня/октобра в Креници пройде Крениця Форум. То медженародна подія, што получыт бізнес, політику і світ наукы. Перша едиция конференциі пройде під гослом «Ріст і одбудова». До курорту і реґіону має притягнути світовой славы експертів. Цілю того нового форум є створити одповідні условія до неограниченой выміны думок, мериторичного спору, дискусий на найважшнійшы соспільно-економічны темы та синерґія і зміцняня реляций медже децидентами і лідерами. Дискусиі пройдут в рамках 5 темовых стежок: Безпека і ґеополітика, Господарка зміны, Енерґія і климат, Соспільство будучности та Тренды здоровля. Орґанізатором конференциі є краківскій think tank Інституту Косцюшкы. Малопольскє Воєвідство є єй Титулярным Партнером.

Ансамбль Барвінок, што співат і гарт уж 70. років, выступит в Білянці

Припоминаме, што уж в найблизшый вікенд пройде ювілейна, ХХХ Лемківска Творча Осін – свято лемківской літературы, стріча з творцями текстів з обшыри красной літературы, а тіж з тыма, што пропаґуют лемківску літературу в інчых языках. Тогорічна едиция посвячена буде памяти поеты, драматурґа та соспільно-політичного діяча Павла Стефановского, зато першый ден подіі пройде в Білянці, в рідным селі Стефановского. Другій ден, традицийні, пройде в просторах Руской Бурсы. В рамках артистичного проґраму части в Білянці выступит русиньскій ансамбль Барвінок з Камюнкы, котрый того рока празднує округлый ювілей – 70. річницю діяльности. Названя ансамбю бере ся од цілорічні зеленой рослины, котра товаришыт нашым людям од народин до смерти, хоснувана є в вельох звыках і обрядах. Як раз тоты русиньскы традициі презентує в рамках своіх выступів камюньскій ансамбль і його ґрупы: Барвінок, Барвіночок та Барвінок-Сеньоры. Ансамбль выступит в суботу, 8. жолтня/октобра, по 17.00 год. в Сельскым Домі в Білянці.