Сумар дня на 6. червця/юнія 2023 р.

Приносиме вам сумар медияльной ґрупы ЛЕМ.фм+ на ден 6. червця/юнія 2023 р.

Стріча з проф. Павлом Робертом Маґочійом

Днес о 18.00 год. пройде перша з двох авторскых стріч з проф. Павлом Робертом Маґочійом, автором публикациі «Pod osłoną gór. Dzieje Rusi Karpackiej i Karpatorusinów». Стріча одбуде ся в Інституті Істориі Штукы Вроцлавского Університету. Друга стріча одбуде ся заран, 7. червця/юнія в Collegium Witelona в Ліґници о год. 16.30. Припоминаме, што по другій стрічы в Ліґници пройдут консультациі в справі вписаня на Державный Спис Нематерияльной Культурной Спадковины лемківского языка і лемківской культуры. Сут они одкрыты для вшыткых Лемків, котры ідентифікуют ся з лемківскым языком і лемківском культуром.

Штораз менше діти записаных до русиньскых одділінь в школах

В четвер 1. червця/юнія в Новым Саді прошло перше засіданя Комісиі до справ освіты нового скликаня Нацийонального Совіту Русинів. В проґрамі стрічы нашло ся десят пунктів до дискусиі, але найважнійшом темом была інформация о чыслі записаных на будучый шкільный рік діти до русиньскых одділінь в школах. За представленыма даныма в Коцурі записало ся лем 4 діти, в Дюрдьові 5, а в Рускым Керестурі 49 учеників. Найбільшый проблем єст в Коцурі, бо згідні з обовязуючыма переписами до одкрытя русиньского одділіня мусит быти записаных мінімум 5 діти. За інформациями аґентуры Рутенпрес на будучый рік буде іщы більшый проблем, бо єст менше діти, а родичів до записаня не переконує ани признавана школярям стипендия. Другій проблем, з котрым боре ся комісия, то выдаваня русиньскых підручників, бо великым выдавництвам не оплачат ся друкувати на малу скалю, што  продолжат процес друкуваня. На тоту хвилю готовы сут лем підручникы до наукы материньского языка для першой клясы.

Поломничество нацийональных і етнічных меншын на гору св. Анны

В неділю 4. червця/юнія представникы нацийональных і етнічных меншын в Польшы взяли участ в поломничестві на гору св. Анны. Подія зачала ся од спільной молитвы, котру очелювал Пьотр Тарліньскій, душпастыр нацийональных меншын. Пак голос мал Рафал Бартек – ведучый Соспільно-Культурального Товариства Німців на Опольскым Шлеску. В своій выповіди однюс ся м.ін. до ограничыня в школях годин вчыня німецкого языка як языка нацийональной меншыны ци голосных в остатнім часі антинімецкых тонів в спорах політиків. Подякувал і вшыткым, котры противляют ся такым діяням і продолжают свою роботу для польско-німецкого порозумліня. В подіі участ взяли тіж амбасадор Німец в Варшаві, консуль Федеральной Респулбикы Німец в Ополи і представничка Опольского Воєводы. Літургію в Люрдскій Яскыни правил німецкій єпископ Ulrich Neymeyer разом з помічничым опольскым єпископом Вальдемаром Мусіолом. Разом з поломниками молили ся за неприсутных того рока на поломничестві Ромів, в інтенциі жытелів Украіны та о здоровля опольского єпископа Анджея Чаі.

Перша стріча Комісиі до справ орґанізациі ювілею 100-літя автокефалиі Православной Церкви в Польщы

Канцелярия Православного Митрополиты Варшавского і цілой Польщы передала, што 31. мая під кєрівництвом владыкы Юрия, архієпископа вроцлавского і щеціньского, Православного Войскового Ординария прошла перша стріча Комісиі до справ орґанізациі ювілею 100-літя автокефалиі Православной Церкви в Польщы. В часі стрічы окрислено, над чым буде працувала комісия в найблизшым часі і зглошено можливы ініцятивы. Головном цілю комісиі єст промоция православной церкви і єй культуровой спадковины через орґанізуваня ювілейных подій.