Сумар дня на 6. грудня/децембра 2021 р.

Приносиме вам сумар медияльной ґрупы ЛЕМ.фм+ на ден 4. грудня/децембра 2021 р.

Ден Русинів Польщы 2021

Вчера, в неділю, 5. грудня/децембра, в ден 103. річниці фльориньского віче, якє дало початок Рускій Народній Республиці Лемків, праздували сме наше нацийональне свято – Ден Русинів в Польщы. Спільны святкуваня были орґанізуваны Стоваришыньом «Руска Бурса» в Ґорлицях і Стоваришыньом Лемків. Перша іх част прошла во Фльоринці, в долинці перед плебанійом, де перед роками нашы предкы зобрали ся на віче. Дальша част тогорічного Дня Русинів в Польщы проходила в ґорлицкій Рускій Бурсі, де др Анна Вільк выголосила выклад пн. «Довкола бадань над історийом і достоменністю Лемків». Пак в артистичній части, авторскій репертуар запрезентувала Дария Текля Кузяк з ансамбльом, в концерті пн. «Од традициі до сучасности».

Пропамятна таблиця в рідным селі Жатковича

В пятницю, 3. грудня/децембра, на стіні адміністрацийного дому села Голубине, Поляньской Сельской Рады, была одкрыта пропамятна таблиця, припоминаюча, же в періоді од 8. мая 1919 до 29. червця/юнія 1945 рока територия днешньой закарпатской области Украіны была частю Чехословацкой Республикы і мала назву Підкарпатска Русь. Таблиця была одкрыта в рідным селі Григория Жатковича, першого ґубернатора Підкарпатской Руси, при нагоді 135. річниці його народжыня. Текст на таблици єст в чешскым, словацкым і украіньскым языках. По торжественным одкрытю пропамятной таблиці одбыл ся округлый стіл, присвяченый річници народжыня Жатковича. Більше про подію чытайте на нашым портали.

Нове чысло «Бесіды»

Вышло остатнє уж в тым році чысло часопису Стоваришыня Лемків – «Бесіда», ч. 6 (183) за місяці листопад/груден. В середині найдеме «Календар Бесіды на 2022 рік», ци реляциі з подій, якы проходили в русиньскым світі літом і на початку осени. В выданю прочытаме м.ін. статі: Петра Трохановского, про 30-літя Руской Бурсы і 10-літя нашого радия ЛЕМ.фм, ХХІХ Лемківску Творчу Осін і 200 річницю народжыня Йосифа Сембратовича, Монікы Тылявской про 20-літя основаня лемківской філолоґіі, Петра Медвідя про XVI Світовый Конґрес Русинів в Креници і першого лавреата преміі Pro Arte Ruthenorum Володимира Микыту, ци дописы Андрия Ковальского пн. «Ластівочка дале нагороджувана» і «Євген Габура серед Личности Рока Польщы». Як все, найдеме в часописі і вісти в части «Новины не новины – не лем з Лемковины», Амрозове казаня, лемківскы фразеолоґізмы і анеґдоткы. Почытаме тіж выімкы з польскых і словацкых ґазет, якы дотулялют тем близкых нашій справі.

Выстава творів Атаназа Фединця

В четвер, 2. грудня/децембра, в Русиньскым Грекокатолицкым Центрі в Дебречыні-Йовжы, на Мадярах, Вседержавне Русиньскє Самосправуваня одкрыло ювілейну выставу русиньского артисты Атаназа Фединця. Вернісяж одбыл ся в ден 85. річниці народжыня того родженого в Ужгороді авантґардисты. На вернісажы до участных звернула ся Віра Ґіріц, посланкыня за Русинів в мадярскым парляменті, і маляр Томаш Асталош. Выстава буде одкрыта до початку липця/юлия будучого рока.