Сумар дня на 6. грудня/децембра 2022 р.

Приносиме вам сумар медияльной ґрупы ЛЕМ.фм+ на ден 6. грудня/децембра 2022 р.

«Безпечна Малопольща»

Аж 28 ратівничых авт трафит до єдиниц Охотничой Протиогньовой Стражы з малопольского воєвідства в рамках проєкту «Безпечна Малопольща – пожарничы авта». Заряд Воєвідства на основі результатів в двох конкурсах выбрал 28 єдиниц ОПС і штырі єдиниці гірского ратівництва. Реализация проєкту для єдиниц протиогньовой стражы обнимат закуп легкых авт технічного ратівництва з функцийом гашыня, а для гірскых ратівників – тереновых. Серед бенефіциєнтів сут такы ґміны як Крениця – ОПС Берест, Ґорлиці – ОПС Кленчаны ци ОСП Паґожына в ґміні Липинкы. В конкурсі направленым на GOPR і TOPR выріжнено Татряньску Охотничу Страж і три реґіональны ґрупы GOPR – Бескідску, Підгаляньску і Юрайску. Як підкрислил віцемаршалок Малопольского Воєвідства, новы поізды допоможут ратівникам нести поміч, добре выпосажыня дозволит на скору реакцию і успіх, але тіж піднесе комфорт працы. Безпека жытелів Малопольщы і туристів то барз важна квестия. Зо взгляду на великє заінтересуваня конкурсом, заряд воєвідства рішыл збільшыти пулю дофінансуваня, так жебы піпору достали і ґміны з резервовой листы.

Істория і краса єдной з найстаршых церкви в ґміні Команча

Kінцьом листопада/новембра ґміна Команча поділила ся на своім інтернетовым сайті фільмом промуючым історию і красу забытковой Православной Церкви св. Михала Архангела в Туряньску. Фільм єст частю проєкту «Східньославяньска культурова спадковина – консервация, реновация і діґітализация деревяных церкви в Малопольщы, на Підкарпатю, Любельщыні і Підляшы». Цілю проєкту, котрый закінчыл ся того рока, была одбудова православных традиций вздолж східньой границі з єдночасном підпором культурово-реліґійной туристикы. В святыни од часів єй побудуваня – на початку XIX ст., окрем православных служыли тіж грекокатоликы і римокатоликы. Хоц днес служыт невеликій громаді, то тішыт ся популярністю серед туристів, котры в туристичным сезоні часто заходят до середины. Церков єст влучена до підкарпатского Шляку Деревяной Архітектуры і находит ся на списку світовой спадковины UNESCO. В фільмі участ взяли о. Юлиян Феленчак і архієпископ Авель, котры оповідают не лем о понад 200-літній церкви, але тіж загальні о істориі православія на Лемковині. O промуючым фільмі припоминат ґміна Команча і запрашат одвиджати церкву.

«Стріча з воскресшым» – выстава сучасных ікон

Округовый Музей в Новым Санчы і орґанізаторы XIV Медженародных Варштатів Іконописаня Новиця-Весола 2022 просят на выставу сучасных ікон пн. «Стріча з воскресшым». Находит ся она в Ґалицийскым Місточку і мож буде ю обзерати аж до 12. лютого/фебруара 2023 р. Іконы, котры презентуваны будут на выставі возникли в часі стрічы іконоґрафів в Весолой в парафіі Божой Опікы. Головном думком, а пак і темом того пленеру была ідея навязаня і підпоры в звязку з войном на Украіні, котра тыкат тіж членів Медженародных Варштатів Іконописаня. Зато одкликаня до терпліня Христа, але тіж до його воскресіня. Выставу мож обзерати од 10. грудня/децембра, товды тіж о 17.00 год. в Музею пройде вернісаж прац.

Новы атракциі в ґорлицкым повіті

Быти може іщы того рока зачне ся будова наступной вежы в ґорлицкым повіті – іде о видокову вежу в Мощеници. Як передал війт ґміны Мощениця, власти старали ся о реализацию той думкы од близко 7 років. По розписаню пятьох конкурсів вкінци ся подарило і єст уж выконавця. Як підкрислят війт ґміны, проблем был в коштах звязаных з інвестицийом, початковый кошторис был аж о мілийон злотых менчый од того, котрый два рокы пізнійше нашол ся на догваріню. Вежа буде мала 27 м высокости і повинна быти готова під конец будучого рока.

фот. Шляк Деревяной Архітектуры Підкарпатя, автор Ян Уліцкій