Сумар дня на 6. квітня/апріля 2022 р.

Приносиме вам сумар медияльной ґрупы ЛЕМ.фм+ на ден 6. квітня/апріля 2022 р.

Віра Ґіріц говорцьом русиньской меншыны на Мадярах

В неділю, 3. квітня/апріля, на Мадярах проходили выборы. Віктор Орбан зо свойом правицьово-нацийоналистичном партийом буде рядил четвертый раз. Парляментарны выборы на Мадярах повязаны сут і з выбераньом представників меншын. В змішаній системі выборів до Земского Сойму меншыны мают право выбрати сой депутата або говорцю, в залежности од чысла голосів. Поза німецком меншыном, яка здобыла єден депутатскій мандат, вшыткы дальшы меншыны, разом з русиньском, будут мати свого говорцю. Тот не може голосувати в парляменті, лем в нацийональным парляментарным комітеті. За русиньску меншыну вымінену посаду буде мала Віра Ґіріц, для которй буде то уж третій період на тій функциі. Найважнійшом задачом в найблизшым часі буде подля Віры Ґіріц зрыхтувати списуваня жытелів, а дальше розвиток інфраструктуры діяня інституций і медий, поглубліня спілпрацы з соспільныма орґанізациями, заанґажуваня молодежы і спілпраца з Русинами з інчых держав.

«Pod osłoną gór. Dzieje Rusi Karpackiej i Karpatorusinów» уж о хвилю до придбаня

Як інформує Выдавництво Лібра, уж о два тыжні вкаже ся долгождана в польскым перекладі, фундаментальна для історийоґрафіі Карпат моноґрафія проф. Павла Роберта Маґочія пн. «Pod osłoną gór. Dzieje Rusi Karpackiej i Karpatorusinów» в тлумачыню Марка Круля. Публикация вказала ся дотля іщы в анґлицкым і словацкым языках. Як подає выдавництво, є то перша наукова моноґрафія тыкаюча істориі Карпатскых Русинів і Карпатской Руси, в котрій проф. Маґочій, автор з великым науковым доробком, дає тезу о істнуваню четвертой східньославяньской нацийональности. Уж тепер мож в передпродажы замовити примірник близко 600-страницьовой книжкы, єй ціна то 66,90 зл. Была она написана на основі выкладів для курсу посвяченого істориі Карпаторусинів в рамках проґраму Studium Carpato-Ruthenorum. Тридцет розділів укладат ся в хронолоґічный порядок од преісторичных часів по сучасніст, в котрых Карпатска Русь осаджена є в шыршым контексті держав, якы рядили на єй обшыри.

наМІДИ

Особы, якы выберают ся до Польковиц, або і жыют гын, але хотіли бы ся дознати дашто про найблизшу околицю, можут схоснувати нову аплікацию наМІДИ (naMIEDZI), яка є електронным туристичным провідником по Мідьовым Басені. Аплікация є безплатна, презначена на смартфоны і таблеты, доступна і през браузер на сайті www.namiedzi.com. Аплікацийом адмініструє KGHM, котрый на желаня самоурядів докладат черговы пункты до мап в аплікациі, з описами, додатковым змістом ци фільмами. Аплікация наМІДИ має можливіст презентувати образы 360°, знимкы, фільмы, моделі 3Д. Завдякы схоснуваню технолоґіі Beacon, зміст некотрых пунктів є вкрытый і вказує ся лем товды, коли хоснуватель аплікациі находит ся в конкретній локализациі. Як подає бургомайстер Польковиц Лукаш Пузнєцкій, цілый Мідьовый Басен то копальня туристичных атракций, не лем реґіон звязаный з промыслом, але і з природничыма приметами і історичныма памятками.