Голосник

Сумар дня на 6. липця/юлия 2020 р.

Приносиме вам сумар медияльной ґрупы ЛЕМ.фм+ на ден 6. липця/юлия 2020 р.


Кондоленциі од о. Димитрия Сидора

В минулым тыжни передали сме Вам смутну віст о смерти основателя і шефредактора нашого радия ЛЕМ.фм і долголітнього ведучого Стоваришыня «Руска Бурса» в Ґорлицях, Богдана Ґамбаля. Єст то превелика страта для цілого русиньского світа. «Для русиньского народа, а я розумію Русинів як Лемкы, Русины, Пряшівскы Русины і Русины Підкарпатя, то єден народ, мают велику втрату» – повіл о. Сидор. Своі кондоленциі в імени Закарпатского Общества ім. Кірила і Мефодия. «Смерт Богдана Ґамбаля і для нас велика страта, бо він шефредактор любімого тепер для вшыткых Русинів радия ЛЕМ.фм, в кторым ідут і нашы підкарпатскы радийопередачы. Мы стратили великого порадника, помічника» – додал. Похоронны богослужыня пройдут о 12.00 год. в середу, 8. липця/юлия, в грекокатолицкій церкви Апостолів Петра і Павла в Любіні. Вічна йому памят!

Ґорлиці без желізницьового получыня

В часі вакаций через Ґорлиці не переіхат ани єден потяг. Власти міста рахували, што потягы будут іздити в Бєщады як раз через Ґорлиці і Біч. Курсуют они єднак через Дембицю і Ряшів. Рішыня желізниці не розуміє бургомайстер Ґорлиц, Рафал Кукля. Пут є в векшыні выремонтувана і потягы могли бы ньом іхати скорійше. Подля бургомайстра Ґорлиц, жебы желізницьовый транспорт был зас популярный серед пасажерів, потрібны сут стабільны получыня. Іщы пару місяців назад желізниці одкрыли получыня з Тарнова через Ґорлиці до Загіря, але з незнаных причын діяло оно лем місяц.

Будут трансмітувати православны богослужыня в TVP

Канцелярия Митрополиты Польской Автокефальной Православной Церкви подала до відомости гармоноґрам православных літургій, якы будут трансмітуваны TVP літом тр. В неділю, 12. липця/юлия, буде мож обзерати трансмісию службы Божой з Білостока, а в наступны дві неділі з Турковиц і Залешан, де находят ся православны жіночы монастырі. В першу неділю серпня/авґуста в телевізиі будут трансмітувати літургію з вольской парохіі в Варшаві. 9. серпня/авґуста перенос буде або з ґорлицкой кафедральной церкви, або з Ряшова. В послідні неділі серпня/авґуста в TVP буде мож видіти записы богослужынь з Лодзи і Яблочыны.

Панноніка єднак ся одбуде

Орґанізаторы Фестівалю Панноніка, якій єст єдным з найбільшых переглядів балканьской і циґаньской музикы в Польщы, рішыли, што тогорічна едиция подіі ся одбуде – вшытко при дотримуваню обовязуючых санітарных принципів, спричыненых пандемійом коронавіруса. Музичный проґрам треба было збудувати практично однова, понеже попередні догваріня з артистами сут уж неактуальны. Примірно, не буде ансамблю Via Dacă з Молдавіі – громадяны Молдавіі не мают іщы можливости въіхати до держав Европейской Уніі. Фестіваль буде проходил в послідній вікенд серпня/авґуста в Бартицях над Попрадом і потырват штырі дни. Згідно з обовязуючыма принципами, в концертах може взяти участ максимально два і піл тисяча люди. Білеты сут уж властиві проданы, але як з них дахто зрезиґнує, вернут до продажы. Участникы подіі будут мати обовязок носити маскы. На місци будут тіж доступны плыны до дезинфекциі.

Шеруй.

О авторі

Ленка Стефановска

Коментарі