Сумар дня на 6. липця/юлия 2026 р.

Приносиме вам сумар медияльной ґрупы ЛЕМ.фм+ на ден 6. липця/юлия 2026 р.

В Рускій Бурсі в Ґорлицях прошли річницьовы святкуваня

В минулу суботу 4. липця/юлия проходили святкуваня з нагоды 35-лiтя реактивациi Стоваришыня «Руска Бурса», а тiж 15-лiтя Радия ЛЕМ.ФМ. Перше в каплици на Святій Горі Явір одбыло ся богослужыня в памят Богдана Ґамбаля, думкодавці нашого радия ЛЕМ.фм, реактиватора «Руской Бурсы», заслуженого лемківского діяча. Пак, о 17 год. в Рускiй Бурсi в Ґорлицях мож было выслухати прелекцию проф. Анны Мусь зо Шлезского Унiверситету про етнореґіоналістичный рух на Выжнім Шлеску. Ден завершыл одомаш.

Лемківскы орґанізациі упамятнили бл. п. Богдана Ґамбаля

2. липця/юлия минула 6. річниця смерти бл. п. Богдана Ґамбаля, выдатного лемківского діяча, єдного з основателів одновленой ґорлицкой Руской Бурсы і думкодавцю першого лемківского радия ЛЕМ.фм. В минулу суботу молитовно припoмнули сме покійного Богдана Ґамбаля на Лемковині, на Святій Горі Явір. Традицийно бл. п. Богдана Ґамбаля упамятнило на західніх землях і Стоваришыня Лемків. В 6. річницю смерти на любіньскым цмонтері чест Покійному оддали Ведучый Головного Заряду Стоваришыня Лемків Андрий Копча, член Богдан Копча і секретар Севериян Косовскій, якій представлял тіж Стоваришыня «Руска Бурса» в Ґорлицях і редакцию медияльной ґрупы ЛЕМ.фм+.

Проґрам 15. Русиньской Ватры в Малым Липнику

Уж о пару дни зачне ся ювілейна 15. Русиньска Ватра в Малым Липнику, яку рыхтує орґанізация молоды.Русины. Пятницьовый проґрам зачне ся о 18.00 год. выступами дітячых фольклорных ансамблів. Пак буде перегляд лавреатів і участників послініх річників конкурсу Співы мого роду, і проґрам з назвом Вечур русиньскых голосів. Ден завершыт ся вечерньом забавом. Суботній ден ватры зачне ся піл до пятой ”Мозаіком Реґіону” – проґрамом фольклорных колектівів з реґіону і близкой околиці. Дальшы ансамблі запрезентуют ся пак в проґрамах ”Витайте, сусіды” і ”В крузі жывота”. Ден завершыт вечерня забава. Окрем того в рамках супроводнього проґраму буде мож скоштувати традицийны стравы з реґіону, взяти участ в варштатах народной вышывкы, выробів модротлачів і ситодруку. Буде тіж школа танця, выстава фотоґрафій і активности про діти. В неділю рано в храмі свв. Космы і Даміяна правлена буде торжественна св. Літургія, а пак пройде концерт духовной пісні. В тым році орґанізаторы зрыхтували тіж специяльну мобільну аплікацию, в котрій находит ся комплетный проґрам фестівалю в русиньскым, словацкым і польскым языках, мапа ареалу, контакт до орґанізацийного тіму і важны оголошыня, як і можливіст пересланя орґанізаторам рецензиі. Дрібниці найдете на фейсбуковым сайті Русиньска Ватра.

Православны торжества на святій Горі Явір

Уж в найближшу неділю на святій Горі Явір православны Лемкы будут празднувати ден святых апостолів Петра і Павла. В тым році одзначена буде там тіж 100. річниця повороту Лемків до православія. В найблизшу пятницю выйде 36. піше поломництво, котре тым разом вело буде шляком Повороту Лемків до Православія – од Тылявы через Святкову Велику, Свіржову Руску, Бортне, Баницю, Вірхню, Ґладышів, Смерековец, Квятонь, Шквіртне, Ганчову і Высову. В передден свята в Ганьчовій будут ся правити вечырні богослужыня. В ден святя, в неділю 12. липця/юлия поломникы перейдут до Высовы – при церкви св. Архістратига Михала привитаны будут єрархы. Пак вшыткы вірны выйдут вєдно на Святу Гору Явір, де о 10.00 год. буде правлена Свята Літургія. Тоты, котры бы хотліли піти в поломництві, можут зголосити свою участ іщы днеска.