Сумар дня на 6. мая 2022 р.

Приносиме вам сумар медияльной групы ЛЕМ.фм+ на ден 6. мая 2022 р.

Вірны з Мукачівской Єпархіі зберали грошы для біженців з Украіны

Як поінформувал Пресовый Центр Кошыцкой Єпархіі Даніель Черный, Пітсбуржска Грекокатолицка Митрополия зорґанізувала найвекшу збірку грошів в своій істориі. В часі колекты, котра прошла в Пітсбуржскій Архієпархіі і єпархіях Пассаік, Парма і Фенікс, зобрано аж піл мілийона дулярів. Грошы підут до Материньской Церкви Пітсбуржской Митрополиі – Мукачівской Єпархіі. Завдякы колекті єпархія буде могла допомочы біженцям з Украіны, котры втікаючы перед войном, нашли схороніня на єй териториі. Вірным подякувал митрополита архієпископ Віллям Скурла. Підкрислил, што барж тішыт го така щедріст і охота помочы біженцям. Єдночасно додал, же продолжуют в підпорі і штоденній молитві, жебы тото терпліня як найскорше ся скінчыло. За щедріст грекокатолицкых вірных Пітсбуржской Митрополиі подякувал тіж владыка Ніль Лущак, апостольскій адміністратор Мукачівской Єпархіі. Рекордову суму зобрали в марци і в рамках збіркы, котру голосила Пряшівска Архієпархія. Вірны зобрали історічні найвекшу суму, котра была зберана в храмах Пряшівской Архієпархіі – 110 000 евро. Грошы з колекты в більшости будут переданы до Мукачівской Єпархіі, а част лишит ся на поміч біженцям, котры прожывают на обшыри архієпархіі.

«Духы бескідскых лісів» – выстава вказуюча красу Низкого Бескіду

Маґурскій Нацийональный Парк просит на выставу пн. «Духы бескідскых лісів» авторства Едиты Мікусь. Выстава то перша част проєкту «Карпаты в Дереві Малюваны». Мож буде обзерати образы, якы так на полотні, як і просто на дереві, котры вказуют красу Низкого Бескіду. Як підкрислят авторка – дерево, на котрым творит, єст барз важным елементом цілого образу, особливо зато же позыскуване єст з обшыри Низкого Бескіду. Такє схоснуваня має на ціли получыня образу з представленым на ним краєвидом. Дошкы отримуваны сут зо старых хыж, одпадів в тартаках або поваленых через вітер дерев. Выстава зачне ся 6. мая і мож ю буде обзерати в Едукацийно-Музейным осередку Маґурского Парку аж до 29. червця/юнія. Вступ на выставу єст безплатный.

В Команчы орґанізуют кулінарну прелекцию і варштаты

Ґмінный Осередок Культуры в Команчы та бібліотека в Щавным просят на стрічу реализувану в рамках проєкту «З лемківском нутом і смаком – свобідны од залежности». Подія пройде 12. мая в Осередку Культуры в Щавным. В рамках стрічы одбуде ся прелекция на тему лемківскых страв, а пак кулінарны варштаты при спілпрацы з ансамбльом Лем-Мы. Вступ на стрічу єст дармо, обовязує єднак скорша резервация місц. Більше дрібниц находит ся на сайті Ґмінного Осередка Культуры Команча.

«Украіньскє козацтво» авторства Мирослава Трохановского лем до 11. мая

То остатній вікенд коли мож обізрити в ґорлицкій Ґалериі Двір Карвациянів выставу Мирослава Трохановского пн. «Украіньскє козацтво». Початково выстава мала наголовок «Місто нескінчене», але як пояснят автор, з причыны атаку Росиі на Украіну рішыл змінити характер експозициі. Тым самым хоче вказати свою підпору воюючым о свою державу Украінцям. Мирослав Трохановскій єст выдатным лемківскым іконописцьом і малярьом. Єст основательом карпатской працовні іконописаня в Білянці під назвом «Мандиліон». Занимат ся він тіж малюнком, рисунком і різбом. Його творчіст то головно навязуваня до істориі украіньскых козаків, а тіж русиньскых збійників. Выставу мож буде обзерати до 11. мая.