Приносиме вам сумар медияльной ґрупы ЛЕМ.фм+ на ден 6. серпня/авґуста 2020 р.
Наш Никыфор на Мадярах
Музеі в партнерскых містах в Польщы і на Мадярах – в Новым Санчы і Кішкунгаляш – рішыли запрезентувати роботы узнаных в своіх державах артистів: Никыфора – Епифана Дровняка, выбраны з колекциі Округового Музею в Новым Санчы, і роботы Віолі Беркі з колекциі Музею Яноша Тормы в Кішкунгаляш. Віола Беркі то мадярска малярка, яка творила в ХХ ст. і на початку ХХІ ст. Выміна выстав мала быти перше реалізувана в маю в рамках проґраму «Промоция польской культруы за границьом» згідно з заложынями проєкту дофінансуваного з Фонду Промоциі Культуры Міністерства Культуры і Нацийональной Спадковины в Польщы, але з причыны пандеміі мусіла быти перенесена. Проєкт двоіх музеів єст дальшом спільном акцийом, тым разом при хоснуваню віртуального простору. «Музеі надіют ся при тым, што в ліпшым часі дійде до реалізациі реальных выстав, Никыфора в Ґалериі Беркі в Кішкунгаляш і в Польскым Інституті в Будапешті та робіт Віолі Беркі в Музею Никыфора в Креници» – кінчыт М. Марціновска, головна специялистка дс. орґанізуваня выстав в Округовым Музею в Новым Санчы. Партнерство Нового Санча і Кішкунгаляш тырват од 1993 р. Проєкт доступный єст на сайтi nikiforberki.pl.
Ремонт церкви в Ріпнику
Церков св. Параскєвы в Ріпнику на Короснянсій Руси буде модернізувана. Ремонт буде можливый, подібні як в примірі подібных святынь в реґіоні, завдякы мышпергачам. Інвестицю буде реалізувала Реґіональна Дирекция Охороны Середовиска в Ряшові. Цілю проєкту є сохранити рідкій рід мышпергача, але так само забдати о церков. Буде м.ін. модернізуваный дах святыні з єдночасном выміном деревяных елементів, котры вымагают скорой інтервенциі. До того плянуваны сут роботы на поді святыні, жебы пристосувати стріху для жытя мышпергачів. Конец робіт заплянувано на конец марця будучого рока. Церков св. Параскєвы была побудувана в 1912 р. При ній стоіт о вельо старша деревяна дзвінниця з дзвоном датуваным на 1601 р. По выселіню Русинів, храм был переданый римокатоликам. Од 1990 р. є вписаный до реґістру памяток.
Позераня на мышпергачів в ізбяньскій церкви
Лишаме ся в темі мышпергачів, котры полюбили сой жытя під стріхами старых лемківскых церкви. Уж заран, Товариство з Низкого Бескіду вєдно з блоґом Баба з гір запрашают вшыткых заінтересуваных посмотріти на цікаву подію. Буде то можніст призріти ся нічному літаню мышпергачів в церкви св. Лукы в Ізбах. Недавно дах ізбяньской святыні был выремонтуваный з середків Реґіональной Дирекциі Охороны Середовиска в Кракові в рамках єдного з проґраміх охороны мышпергачів. Заранішня подія зачне ся од стрічы при церкви о 19.30 год. В проґрамі передвиджено звиджаня муруваной церкви св. Лукы, анімациі, гры і забавы, як тіж оповісти о жытю мышпергачів. На заверышня подіі буде мож пообсервувати нічне літаня мышпергачів, а точнійше іх вылітуваня з ізбяньской церкви. Вступне на подію то символичне 10 зл.
Коментарі