Сумар дня на 6. вересня/септембра 2022 р.

Приносиме вам сумар медияльной ґрупы ЛЕМ.фм+ на ден 6. вересня/септембра 2022 р.

Друга річниця смерти леґендарной русиньской співачкы Ольгы Прокоп

Як поінформувал Юрий Шыпович, голова Русиньского Культуролоґічного Клюбу, члены орґанізациі вєдно з членами орґанізациі «Наохтема в рокаши» і русиньскым дітячым ансамбльом «Бабчина співаночка» пішли 4. вересня/септембра на могылу леґендарной русиньской співачкы Ольгы Прокоп. Окрем того активісты брали участ в репетициі дітячой ґрупы, яка не перестала фунґувати по смерти свойой основателькы і ведучой – Ольгы Прокоп. Ведучом ансамблю єст внучка Прокоп – Наталия Симчык. «Бабчина співаночка» од початку істнуваня в своім репертуарі ставлят на автентичны русиньскы співанкы, што в днешніх часах єст і дакус унікатове. Зато підтримуваня діяльности такых ансамблів єст барз важне для сохраніня і розвитку русиньской культуры і языка. Колектив не єст єднак фінансуваный державом, отримує лем підпору од меценатів. В часі стрічы члены карпаторусиньскых общественных орґанізаций обіцяли, же будут підтримувати фунґуваня «Бабчиной співаночкы».

Розпочал ся фінал цемой едициі конкурсу Польковицкій Громадяньскій Буджет

Од 5. аж до 19. вересня/септембра жытелі ґміны Польковиці можут голосувати на проєкты в конкурсі Польковицкого Громадяньского Буджету. В фіналі семой едициі конкурсу нашло ся 21 проєктів. Як підкрислил бургомайстер Польковиц, Лукаш Пузнєцкій, не єст то лем конкурс, але тіж підповід для власти, якы інвестициі сут важны для жытелів і в котру страну повинна ся розвивати ґміна. На реализацию проєктів презначеных єст 2 млн зл. Сума ділит ся на фінансуваня проєктів з сельскых – 900 тис. зл, і містецкых обшыри – 1,1 млн зл. Того рока голосуваня пройде лем в безпосередній формі, через карты до голосуваня. Як пояснят ратуш в Польковицях, тогорічна форма голосуваня спричынена єст технічныма проблемами, незалежныма од уряду. Вшытко зо взгляду на зміну авторизуючого систему, што унеможливлят електронічне голосуваня. Прото в місті вызначено 4 пункты, де аж до 19. вересня/септембра мож оддати свій голос. Додатково в некотры дни голосуваня буде ведене в сельскых світлицях. Гармоноґрам тых голосувань находит ся на сайті Польковицкого Уряду.

Што з перебудовом желізницьового дворця в Ліґници?

Звязок PKP Польской Желізниці іщы перед кінцьом того рока хоче підписати догваріня з новым выконавцьом будовляных прац на стациі в Ліґници. Під конец червця/юнія PKP розвязало умову з фірмом Fewaterm, котра од 2018 р. занимала ся перебудовом пероновой части желізницьового дворця в Ліґници. Причыном было за помале темпо прац, а што за тым іде – зміна терміну закінчыня проєкту. Як підкрислят прасовый представник звязку PKP, працы на ліґницкій стациі будут продолжаны. Закля што ведена єст івентаризация. Треба окрислити, што іщы мусит зробити нова ремонтова фірма і якій буде кошт закінчыня проєкту. Вступні модернізувана частина дворця буде зас доступна до хоснуваня перед кінцьом 2023 р.

«Гарасиміяда» о Єжым Гарасимовичу і його вершах

Публична Бібліотека ім. Єжы Гарасимовича в Команчы разом з Ґмінным Осередком Культуры в Команчы просят на XIII едицию «Гарасиміяды». Подія посвячена єст творчости Єжы Гарасимовича – поеты, котрый в своіх творах описувал Бескіды і Бєщады, в тым Лемовину і Бойківщыну. Стріча зачне ся о 16.00 год. в реставрациі «Під коминком». В проґрамі заплянуваны сут рецитациі вершів Гарасимовича, вручыня нагорід в поетицко-плястичным конкурсі «Бєщадскым вітром несены» ци прелекциі запрошеных гостів. На конец в музичній части запрезентуют ся ансамбль Вернигора і Ельжбєта Адамяк. В часі подіі мож буде обзерати выставу памяток звязаных з Єжы Гарасимовичом.