Сумар дня на 7. червця/юнія 2021 р.

Приносиме вам сумар медияльной ґрупы ЛЕМ.фм+ на ден 7. червця/юнія 2021 р.

Ювілейна стріча в Рускій Бурсі

1. червця/юнія 2021 р. минуло рівно 10 років, одколи в ефір пішли першы звукы першого лемківского радия ЛЕМ.фм, думкодавцьом якого был Богдан Ґамбаль. З нагоды річниці в минулу пятницю, 4. червця/юнія, в Рускій Бурсі в Ґорлицях проходила ювілейна стріча не лем теперішніх редакторів і робітників медияльной ґрупы ЛЕМ.фм+, але і бывшых спілпрацівників радия, яка трансмітувана была в радию ЛЕМ.фм. Спільні спомнули сме на початкы радия, його розвиток, порталь, працівників, а і бесідували сме про надіі на будуче. Дякуєме Вам, дорогы слухачы, же сте з нами были за тых послідніх 10 років, але маме і надію, же фурт іщы з нами останете. Відео зо стрічы доступне єст на нашым фейсбуковым фанпейджы.

Хотят зліпшыти біциґльовы обставины в рамках словацко-украіньского трансграничного реґіону

Як інформувала в пятницю, 4. червця/юнія, Леа Геілова з Одділіня Комунікациі і Пропаґациі Пряшівского Самосправного Краю, председа краю Мілян Маєрскій підписал ґрантовый контракт на проєкт пн. «Зліпшыня доступности і мобільности в рамках словацко-украіньского трансграничного реґіону». Цілю проєкту, называного «Карпатска мобільніст», є підпорити трансграничну спілпрацу при будуваню двох біциґльоокругів – Полонины Трейль на Словациі і Ужаньскій Трейль на Украіні. Кошт реализациі проєкту то понад мілийон евро. В його рамках буде змодернізуваных більше як 6 км біциґльовых трас і выбудуваны будут елементы інфраструктуры, такы як інтеліґентны біциґльовы притулкы в селах Улич і Стащын ци зона одпочываня в Уличы. На ужаньскій біциґльовій стежці будут головно значыти і чыстити біциґльовы трасы, будувати паркінґы, інсталювати інформацийны кіоскы і мапы. Візийом проєкту є зліпшыти біциґльовы обставины модернізацийом одповідньой інфраструктуры вздолж полониньскых і ужаньскых трас.

Схоснуют змінникы тепла до позысканя енерґіі з верчыня в Санковій

Явили ся новы інформациі про будуче горячых басенів в Санковій. Припомнийме, што іщы в 2018 році підняте было рішыня провести пробне верчыня в Санковій – дослідникы виділи шансу одкрыти гын ґеотермію. В минулым році дослідниче верчыня вказало, што в Санковій неє воды, а лем чыстый метан. Ґміна не лишыла єднак думкы о теплых басенах і рішыла превести дальшы досліджыня, маючы на ціли схоснувати найденый ґаз як теплозмінник. В середу, 2. червця/юнія, прошла в тій справі стріча, на якій присутны были Міністер Климату і Середовиска Михал Куртика, Підсекретар Стану в тым же Міністерстві Пьотр Дзядзьо, Заступця Председы Заряду Нацийонального Фонду Охороны Середовиска і Водной Економікы Артур Міхальскій та Війт Ґміны Санкова Малґожата Малух. Вчас стрічы выголошеный был проєкт, першый того типу в Польщы і єден з першых в світі, пн. «Схоснуваня енерґетичного потенциялу зліквідуваных, по-експолоатацийных або неґативных дірах по верчыню – пілотаж для верчыня Санкова ҐТ-1». Як подали, енерґія позыскувана з внутри Землі завдякы глубокым змінникам тепла збільшыт участ одвертальных джерел енерґіі в локальным центральным огріваню, што ся вписує в інвестицийны пляны ґміны. На тоту ціль Урядовый Фонд Локальных Інвестиций передал 3,8 млн злотых.

Прелекция про Лемків в Музею Мушыньского Ключа

Реґіональный Музей «Мушыньского Ключа» діючый при Містно-Ґмінным Осередку Культуры в Мушыні просит на прелекцию пн. «Лемкы в Мушыньскым Ключы». Выголосит ю історик мґр Кжыштоф Мачуґа. Выклад одбуде ся в пятницю, 18. червця/юнія, о 16.00 годині в Музею в Мушыні при ул. Кривій 1. Вступне дармо. Орґанізаторы припоминают о ограниченым чыслі місц і просят взяти зо собом масочкы.