Сумар дня на 7. липця/юлия 2021 р.

Приносиме вам сумар медияльной ґрупы ЛЕМ.фм+ на ден 7. липця/юлия 2021 р.

Порядкуваня місц культу

Перед двома днями Братство Православной Молодежы Перемышльско-Ґорлицкой Єпархіі упорядкувало св. Гору Явір пред праздником свв. Петра і Павла, котрый традицийні буде гын проходил 12. липця/юлия, а од суботы, 10. липця/юлия, рушат ХХХІ Православне Поломництво на св. Гору Явір. Інча ґрупа – ґрупа любителів істориі, упорядкувала жыдівскій цмонтір в Рыманові. Порядкуваня проходило в рамках діянь підкарпатской ґрупы з Форум Діалоґу – найвекшой і найстаршой польской позаурядовой орґанізациі занимаючой ся польско-жыдівскым діалоґом. В стрічы участ взяли м.ін. представникы міста і ґміны Рыманів, скауты та опікуны жыдівскых цмонтерів в Рыманові, Новым Змигороді і в Воли Миховій на східній Лемковині. Кіркут в Рыманові был основаный в XVI ст., занимат простір веце як 2,5 га. Заховали ся на ним два огелі похованых гын цадиків. Становит єдну з найцікавшых і найвеце одвиджаных жыдівскых некрополий в підкарпатскым воєвідстві.

Лося і Климківка до пересмотріня

В днях од 19. липця/юлия до 6. серпня/авґуста в будинку Повітового Староства в Ґорлицях буде выложеный до пересмотріня для заінтересуваных проєкт описово-картоґрафічного операту модернізациі евіденциі ґрунтів і будинків обшыри Лося і Климківка. Документация того проєкту складат ся з реґістру земель, будинків, локалів, картотек будинків, локалів і евіденцийной мапы. Вшыткы заінтересуваны мают право запознати ся з том документацийом та зголосити увагы. Як раз цілю выложыня до перезріня реченого операту обшыри Лося і Климківка є выімати евентуальны хыбы і порушыня.

Етноґрафка од Лемків нагороджена

Етноґрафка з Округового Музею в Новым Санчы Мария Бриляк-Залуска остала тогорічном лавреатком нагороды ім. Оскара Кольберґа. Премія признавана є за заслугы для народной культуры. Бриляк-Залуска была выріжнена в катеґориі «Наукова, документацийна діяльніст, анімация і популяризация народной культуры». Вручыня нагорід прошло на Королівскым Замку в Варшаві 1. липця/юлия. Лавреатка, Мария Бриляк-Залуска, вродила ся в 1943 р. во Львові. Была студентком проф. Романа Райнфуса. Велику част єй етноґрафічных заінтересувань становлят Лемкы і Лемковина. Єст авторком чысленных дописів і публикаций про народну культуру. Од вельох років є кєрівничком Сандецкого Етноґрафічного Парку, котрый спілтворила, а тіж і была авторком концепций його аранжациі.

Ольга Пелехач – матуристка на 100%!

Відомы сут уж результаты тогорічных матуральных іспытів. Од понеділька, 5. липця/юлия, матуристы можут провіряти іх в системі Округовых Еґзамінацийных Комісий. До еґзамінів зо вшыткых обовязковых предметів приступило 273 419 тогорічных абсольвентів середніх шкіл. Обовязково здає ся польскій язык, математику та выбраный чужый язык. Припомнийме, што того рока дві матуристкы зо шкіл в Ґорлицях рішыли провірити своє знаня іх материньского языка – лемківского. Єдном з матуристок была Ольга Пелехач з Ґладышова, яка спілтворит од двох років редакцию штоденных інформацийных сервісів в нашым радию. Ольга здала матуру з лемківского языка з найвысшым можливым результатом – 100%. Сердечні ґратулюєме!