Сумар дня на 7. липця/юлия 2022 р.

Приносиме вам сумар медияльной ґрупы ЛЕМ.фм+ на ден 7. липця/юлия 2022 р.

В пятницю початок ХІ Русиньской Ватры

Уж заран зачынат ся дводньова ХІ Русиньска Ватра в Малым Липнику на Пряшівскій Руси. Фестіваль пропонує не лем приємну розрывку, але і едукацийны активности. В проґрамі є м.ін. прелекция про овчарство – як ховали, як лікували звірята, якы были звыкы ци ритуалы звязаны з пастырском культуром. Так само на пятницю (але і на суботу) заплянуваны сут школы танця, окремо в суботу пройде презентация книжкы з байками Ганса Андерсена в тлумачыню на русиньскій язык та паліня ватры. Концертову част заполнят ансамблі Русин Чендеш Орхестра, Черговчан, Барвінок ци Лабірскы Бетяре. Выбір з танцювально-драматичного представліня «Хырбетом ку горам» запрезентує ансамбль Рутенія з Братиславы. Радийо ЛЕМ.фм тримат медияльный патронат над подійом.

Упамятніня в Михалові

В найблизшу суботу, 9. липця/юлия, важна подія буде проходила і на землях выгнаня. В Михалові на Нижнім Шлеску, де прожывают бывшы жытелі Фльоринкы і в більшости уж іх потомны, одбудут ся локальны упамятніня 75. річниці траґічной Акциі «Вісла». Подіі пройдут при місцевій православній парохіі св. Михала Архангела. В тот ден має быти торжественно посвяченый оновленый крест, якій находит ся коло церкви. Суботні подіі одбывают ся близко даты, коли выгнаны з Фльоринкы были оселены в помінецкым Михалові – было то 7. липця/юлия 1947 р. (на праздник св. Йоана Крестителя) – товды то 33 фльориньскы родины приіхали зо стациі в Любіні до села. Упамятніня будут тіж нагодом выслухати спомины нечысленных уж выселеных, якы памятают выгнаня.

Прелекция о цмонтерях з І світовой войны

В суботу одбуде ся прелекция посвячена воєнным цмонтерям з часів І світовой войны, з якых вельо находит ся на териториі Лемковины. На подію просят Ґмінный Осередок Культуры в Устю Рускым і локальный культурознавця Анджей Пєцух. Стріча буде тыкала предовшыткым околичных до Устя Руского цмонтерів, кєд же єй наголовок то: «Душан Юркович і його воєнны цмонтері в Ганчівскых Горах і Маґурскым Пасмі». Подія зачне ся о 16.00 год. в Центрі Туристичного і Культурового Продукту Ґорлицкого Бескіду в Высовій. Прелекцию поведе як раз Анджей Пєцух, бескідскій провідник, якій в остатніх роках выдал чысленны публикациі о ґорлицкій земли.

Просиме на Лемківску Ватру на Чужыні

Припоминаме, што в першый полный вікенд серпня/авґуста в Михалові на Нижнім Шлеску одбуде ся 42. Лемківска Ватра на Чужыні. Того рока подія одбуде ся по старому – буде тырвала два дни – 5. і 6. серпня/авґуста. 42. Лемківска Ватра на Чужыні зачне ся в пятницю. І ту ватрян жде новум, кєд же само офіцияльне розпаліня ватры буде дакус пізнійше – як ся уж буде змеркало, так жебы з положыня огня під найважнійше огниско в році зробити шов. Інчом зміном в проґрамі буде тото, што офіцияльна част подіі одбуде ся в суботу, значыт в другій ден Ватры, а не як бывало то до той поры – в пятницю. Музичный проґрам буде збогаченый не лем локальныма ансамблями з Нижнього Шлеска, але і приіздныма, м.ін. з Пряшівской Руси. Певністю не бракне і споминів выселенців – осіб памятаючых тернистый 47′, кєд же в тым році споминаме 75. річницю выгнаня.