Сумар дня на 7. листопада/новембра 2022 р.

Приносиме вам сумар медияльной ґрупы ЛЕМ.фм+ на ден 7. листопада/новембра 2022 р.

Дальшы проблемы ґміны Устя Рускє при модернізациі басену в Высовій

В четвер, 3. листопада/новембра, в Ґміні Устя Рускє мали одкрыти коперты з офертами в рамках конкурсу оферт фірм заінтересуваных розбудовом і модернізацийом басену в Высовій. Як передал війт ґміны Збіґнєв Людвін, третій уж раз ґміна не отримала ниякой оферты. Од 2019 р. басен в Высовій єст закрытый зо взгляду на недостаткы в конструкциі. В червци/юнію тр. Повітовый Інспекторат Будовляного Надзору выдал рішыня, в котрым вызначыл ґміні час до 30. листопада/новембра 2023 р., жебы усунути вшыткы недостаткы при водным парку. Задачом выконавці буде направа конструкцийных і неконструкцийных елементів. В опініі інспекторату час даный на ремонт басену єст дост долгій, хоц як сам подал – направчы роботы будут скомпликуваны. На тоту хвилю не знатя, кілько треба грошів, жебы привернути парк до хоснуваня, але ґміна отримала дофінансуваня з Проґраму «Польскій Лад» в высокости 3,5 млн зл, а скорше іщы 1,6 млн зл з проґраму підпоры ґмін з гірскых обшыри. Середкы на реализацию ремонту сут, бракує лем выконавців. Війт ґміны подал, што іщы перед кінцьом того рока ґміна оголосит наступный конкурс оферт.

Споминали Теодора Ромжу в річницю його смерти

В остатнім тыжни жолтня/октобра в мадярскым селі Лакітелек одбыло ся святочне споминаня великомученика Теодора Ромжы. Подію, яка прошла в містецкым парку, де находит ся пантеон памятників мученикам, котры терпіли за віру, орґанізувало Будапештскє Русиньскє Нацийональне Самосправуваня. Свій памятник має там і русиньскій грекокатолицкій єпископ, котрый был выголошеный за блаженного – Теодор Ромжа. Святочна подія зачала ся од выступліня будапештского хору, пак реферат на тему жытя і траґічной смерти єпископа выголосила др Мариянна Лявинец. Дальше згромаджены зложыли квітя на памятнику і помолили ся. Стріча закінчыла ся одспіваньом русиньского гымну.

В Мушыні інвестуют в зимовы спорты

Місто Мушына надіє ся, што поведе ся зас одкрыти лыжну стацию в Щавнику. Як передал бургомайстер Мушыны, Ян Ґольба, уреґулювали уж квестиі власности і тепер так выжня, як і нижня стациі сут в руках єдного властителя. Менаджер спілкы Дві Долины передал ґміні Мушына обшыр, де находит ся лыжна траса, вытяг і функция насніжаня. Тепер цілю ґміны єст найти інвесторів і середкы на реализацию інвестициі. Ґольба підкрислят, што не мож іщы бесідувати, коли стация буде доступна для любителів зимовых спортів. Вытяг в Щавнику не діє уж од років, необхідна єст його модернізация, а в даякых примірах аж і выміна ґратя. Привернути зимову атракцию бургомайстер і ґміна старали ся од долшого часу.

З Польковиц до Сєрошовиц на ровері

Зачала ся будова наступного одтинка Мідьовой Роверовой Пути, тым разом з Польковиц до Сєрошовиц. Інформацию передал на своім фейсбуковым сайті Віцестароста Польковицкого Повіту. В місци, де ведены сут працы при будові роверовой пути, выступуют невеликы утрудніня в дороговым руху. Концепция Мідьовой Роверовой Пути закладат будову 300 км біциґльовой трасы при спілучасти 19 самоурядів з польковицкого повіту.