Сумар дня на 7. лютого/фебруара 2023 р.

Приносиме вам сумар медияльной ґрупы ЛЕМ.фм+ на ден 7. лютого/фебруара 2023 р.

Список Памяток Істориі збогатил ся о два православны монастырі

В минулым тыжни Президент Польщы Анджей Дуда вручыл опікунам та заряджаючым девятьох обєктів документацию вписаня на листу Памяток Істориі. На списку нашли ся аж два православны монастырі – св. Онуфрия в Яблочній і Супрашльска Лавра. Тот в Яблочній єст найстаршым православным монастырьом в Польщы, істнує безперерывно уж од понад піл тисяча років. Єст безцінным джерелом знаня о істориі, традициі православной Церкви і скарбницьом сакральной штукы, а тіж місцьом жывых музичных традиций. Монастыр в Супршли тіж єст єдным з найстаршых фурт фунґуючых православных монастырів в Польщы. Побудуваны в ріжных історичных періодах будинкы вказуют вельовікове тырваня православной і грекокатолицкой Церкви. Находила ся гев бібліотека і супрашльска офіцина, в котрій окрем літургічных книг друкували тіж выдатны творы Просвічыня. Памятка Істориі то єдна з пятьох форм охороны забытків в Польшы. Узнаня Памятком Істориі означат, же даный забыток або культуровый парк отримуют особливу ранґу з огляду на вартіст для нацийональной культуры.

Медженародны Дни Памяти о Жертвах Голокаусту на Підкарпатю

Од 25. січня/януара до 3. лютого/фебруара проходили XV Медженародны Дни Памяти о Жертвах Голокаусту на Підкарпатю. Упамятніня зорґанізували спільно многы орґанізациі і інституциі, в тым Центр Діалоґу Медже Реліґіями і Нациями ци Інститут Нацийональной Памяти. 3. лютого/фебруара упамятняли морд Жыдів на саноцкым жыдівскым цмонтері. На обшыри некрополиі німецкы окупанты замордували коло 6 тис. Жыдів, Поляків і Русинів. Подія зачала ся представліньом істориі цмонтеря і траґічной долі саноцкых жыдів, пак духовны ріжных конфесий молили ся за замордуваных. Участ в подіі взяли тіж представникы православной парохіі в Саноку і грекокатолицкой парохіі в Мокрым. На конец зобраны зложыли каміня памяти з назвисками части замордуваных гев Жыдів.

«Карпатскій Соспільно-Культуральный Перегляд»

Вышол черговый номер часопису «Карпатскій Соспільно-Культуральный Перегляд». В публикациі мож чытати м.ін. статю о системі охороны природы в Карпатах, допис Анджея Потоцкого «Бєщады од нова» ци бесіду з ведучым Ґмінного Музею Духовой і Материяльной Культуры Бойків в Мычковцях. В новым чыслі «Карпатского Соспільно-Культурального Перегляду» поміщена і статя др Мирославы Копыстяньской о походжыню Лемків і допис др габ. Ґражыны Стояк на тему істориі неістнуючого уж села Криве. Часопис єст доступный на інтернетовым сайті procarpathia.pl.

«Хыжкы / Низкій Безкід» – выстава

До 8. марця в Музею Дворы Карвациянів і Ґладышів мож обзерати выставу авторства Юлиі Яржы пн. «Хыжкы / Низкій Безкід». Працы над презентуваным на выставі цикльом образів тырвали два рокы. Творы сут пробом затриманя в артистичным кадрі найкрасшых, а часто лишеных мешкальных домів, костелів, церкви, як і будинків епохы PRL, якы творят незвычайный кольорит реґіону. Більшіст прац была зрыхтуваня в мішаній техніці – еколіна і лінорыт, лученій техніком коляжу.