Сумар дня на 7. серпня/авґуста 2024 р.

Приносиме вам сумар медияльной ґрупы ЛЕМ.фм+ на ден 7. серпня/авґуста 2024 р.

Выдрукувана «Бесіда»!

Перед 44. Лемківском Ватром на Чужыні явил ся дальшый номер часопису Стоваришыня Лемків – «Бесіда». То ч. 4 (199) за місяці липец/серпен 2024 р. «Бесіда» явила ся зас друком, кєд же попередні три номеры, за перше піл текучого рока, не были дотля дотуваны Міністерством Внутрішніх Справ і Адміністрациі. Початком того рока інформували сме о тым, што МВСіА одмовило фінансуваня найстаршому лемківскому часописови по 1989 р. – «Бесіда». По посланю писма Стоваришышыньом Лемків, а фінальні розписаню через МВСіА додаткового набору внесків на діяльніст меншыновых орґанізаций, Стоваришыня Лемків отримало позитивне рішыня о признаню фінансуваня на выдаваня часопису в 2024 р. Рішыня в тій справі явило ся в другій половині рока. Попри тым, орґанізация хоче выдрукувати три залеглы номеры, якы за січен/лютый, марец/квітен і май/червец явили ся лем в електронічній версиі. В найновшым номері «Бесіды» мож прочытати м.ін. допис Петра Трохановского пн. «Посвячено Пропамятный Крест в Ясюнці», Януша Квокы «Сонце поясніло над Ясюнком» ци Монікы Тылявской «Перша вакацийна прогулька учеників лемківского языка».

Дармова правна поміч для жытелів ґорлицкого повіту

Стоваришыня Sursum Corda реализує проєкт повіреный ґорлицкым повітам, в рамках котрого веде неодплатну правну поміч, неодплатне громадяньскє дорадство і неодплатны медияциі для жытелів ґорлицкого повіту. Мож телефонічні або через інтернетову реґістрацию записати ся на стрічу з адукатом в парох пунктах неодплатной правной помочы, м.ін. в Ґорлицях, Бічы, Лоси і в Бобовій. Цілю того проєкту ґорлицкого повіту є підперти жытелів реґіону порадити сой з ріжныма тяжкыма жытьовыма і правныма ситуациями при підпорі юристів, порадників і медияторів. Стоваришыня Sursum Corda за свою діяльніст было выріжнен м.ін. нагородами Лідер Діяльности PRO PUBLICO BONO 2014 ци Крышталами Соли – Нагородом Маршалка Воєвідства Малопольского 2007. Свою сідибу мают в Новым Санчы.

Упамятнили помордуваных Ромів і Сінті

В минулый вікенд прошли торжества упамятняючы 80. річницю ліквідациі лаґру Ромів на обшыри концентрацийного лаґру Auschwitz-Birkenau. В ночы з 2. на 3. серпня/авґуста 1944 нацисты замордували 4 тисячы мужчын, жен і діти. В лаґрі в Освєнцімі в сумі замордувано близко 21 тис. Ромів і Сінті з 12 держав. Головна част тогорічных упамятнінь прошла в Музею Аушвіц перед памятником жертв. В торжествах участ взяли свідкове істориі і іх родины, котры пережыли пекло Голокаусту, парляментаристы, представникы медженародных орґанізаций і громадяньского соспільства. Были тіж Ромове і Сінті з цілой Европы.

Першый Фестіваль Церковной Музикы в Радружы

В днях од 23. до 25. серпня/авґуста в церкви в Радружы пройде перша едиция Фестівалю Церковной Музикы орґанізувана Музейом Кресів в Любачові. Головным цілю фестівалю є популяризация радружской церкви, яка находит ся на списку світовой спадковины UNESCO та єст Памятником Істориі, як найстарша деревяна церков в Польщы. В церкви св. Параскєвы выступлят Мужскій Хор Церковной Музикы «Катапетасма», Жіночый Хор Церковной Музикы «Армонія», а тіж солиста Євген Скурат. Фестіваль зачне ся прелекцийом знавці іконового малярства о. єпископа др. габ. Михала Янохы, проф. Варшавского Університету. В пятницю вызвучыт концерт під назвом: «Пят століть церковной музикы Польской Республикы», в суботу буде то концерт пн. «Візантийскы і балканьскы джерела церковной музикы бывшой Польской Республикы», зас в неділю – «Реконструкция літургічных форм бывшой Польской Республикы». Радийо лем.фм тримат медияльный патронат над подійом.