Сумар дня на 8. грудня/децембра 2022 р.

Приносиме вам сумар медияльной ґрупы ЛЕМ.фм+ на ден 8. грудня/децембра 2022 р.

Селяне Кривой задбали о лемківскы памятникы в Незнайовій

Як поінформувало Стоваришыня Розвитку Села Крива, хоснуючы остатні гарды осінні дни, члены той соспільной структуры яли ся закінчыня зачатых іщы літом робіт в неістнуючым лемкіскым селі Незнайова. В рамках волонтерскых діянь участникы вымінили вшыткы елементы старых огороджынь крестів і капличок та забезпечыли дві стары студні. Проведены роботы были можливы завдякы спілпрацы Стоваришыня Розвитку Села Крива з ґміном Санкова і ґмінным Осередком Культуры (тоты дві інституциі закупили деревяны жерди на огороджыня памятників). Іщы скорше, бо в жолтни/октобрі члены стоваришыня скосили лукы в Незнайовій. Треба додати, што Стоваришыня Розвитку Села Крива до парох років старат ся на охорону материяльной спадковины Лемків – давных жытелів тых сел.

Вмер Владимір Олеснєвич

З жальом інформуєме, што на 101 році жытя вмер Владимір Олеснєвич, вельолітній жак і дириґент церковного хору парохіі свв. Космы і Даміяна в Студзьонках на Нижнім Шлеску. Покійный был єдным з найстаршых Лемків жыючых в Польщы. Владимір Олеснєвич вродил ся 22. липця/юлия 1922 р. в Перунці на західній Лемковині. Як споминал в єдным з інтервю для нашого радия, рокы прожыти на Лемковині зачыслял до найкрасшых в жытю. По выгнаню з Перункы оселил ся в Бродовицях. Од самого початку оддал ся служыню основаній на землях выгнаня православній парохіі – в Студзьонках, де першым парохом был славный о. Димитрий Хыляк (член уряду Руской Народной Республикы Лемків). Похорон покійного одбуде ся в найблизшу пятницю – о 10.00 год. зачне ся служба божа в церкви в Студзьонках. Вічна Йому Памят!

Свято Копальників в Любіні

В неділю, 4. грудня/децембра, в православній парохіі св. Тройці в Любіні проходили святочны богослужыня з нагоды Дня Копальників. Божеску Літургію, яка зачала ся о 9.00 год., очелил владыка вроцлавско-щеціньской єпархіі і ординарий Польского Войска, архієпископ Юрий. Владыку витали лемківскы копальникы, якы наштоден роблят в компаніі KGHM. Окрем православных копальників участ в молитві взяли чысленны делеґаты і директоры копманіі. До храму были внесены гоноровы копальничы хоругви. Копальникы были позбераны в своі мундуры. Вчас проповіди владыка Юрий звернул ся до вшыткых членів копальничого стану. При кінци парох церкви і заєдно православный капелян копальників, о. прот. Богдан Репела, подякувал архіпастырьови за спільну молитву і іщы раз жычыл вшыткым копальникам тілько выіздів горі, што зъіздів долов.

О Лемковині в Бічу

В Музею Бічской Землі неодолга буде выклад посвяченый Лемковині. О тым заявил директор Музею, др Павел Коцаньда. Ювілейну доповід в рамках 10. Бічскых Науковых Стріч выголосит проф. др габ. Михал Парчевскій. Тема выкладу то: «Початкы Лемковины – міты а дійова реальніст». Подія одбуде ся в віторок, 20. грудня/децембра о 15.00 год. в Домі з Баштом в Бічы. Красні вшыткых просиме.