Сумар дня на 8. листопада/новембра 2022 р.

Приносиме вам сумар медияльной ґрупы ЛЕМ.фм+ на ден 8. листопада/новембра 2022 р.

Выстава прац Юрия Новосільского в Кракові

До 25. листопада/новембра в Краківскій Академіі Красных Штук мож буде обзерати працы Юрия Новосільского. Выстава пройде в рамках проєкту Open Eyes Art Festival. Презентуваны роботы походят з колекциі Ґалериі Стармах. Тым разом видіти мож 16 прац артисты. Куратор выставы задбал, жебы образы вказували як найшырше творчіст Новосільского, зато на выставі находят ся працы од тых найстаршых з 1947 р. аж по тоты намалюваны в 90. роках ХХ ст. Обзераючы завдякы тому мают можливіст порівнати творчіст з цілого жытя артисты. Вступ на выставу дармо. Припоминаме, што з нагоды сотной річниці народжыня маляря Сойм ПР рішыл, же 2023 рік буде Роком Юрия Новосільского. Уж в половині січня/януара в Ґалериі Стармах одкрыта буде выстава прац артисты, котра зачне рік святкуваня і споминаня маляря.

В Бєщадах вернула тема нового польско-украіньского переходу

Участникы конференциі Перемышльского Культурального Товариства заапелювали одкрыти новый туристичный перехід Волосате-Лубня. Як підкрисляют, новый перехід даст можливіст розвитку того цікавого і унікатового макрореґіону Европы. Туристичный перехід одкрыє новый пут з Польщы на Закарпатя, а корыст буде для польской, украіньской, але тіж румуньской туристикы. Не єст то першый раз, коли порушана єст тема нового переходу в Бєщадах. Іщы пару років тому під увагу браны были три локализациі, в 2019 р. на пробу одкрыли часовый граничный пункт Волосате-Лубня, котрый был доступный лем для пішых і роверистів, а перекрочыло го понад 5 тис. осіб. Єднак уж в 2020 р. зо взгляду на коронавіруса пункт был закрытый. Што важне, новый перехід мал бы ся найти в обшыри Бєщадского Нацийонального Парку, што могло бы мати нехосенне влияня на бєщадску хоронену природу.

На долгы осінні вечеры найліпше слуховиско

Фонд Реґіональный Інститут просит на перше з листопадовых «Карпатскых слуховиск». На тот місяц зрыхтуваны сут три слуховиска. Перше під наголовком «Архітектура Бойків і Лемків» пройде уж в середу, 9. листопада/новембра. Стрічу вюл буде др інж. арх. Марек Ґрансіцкій. Прелекция одбуде ся о 17.00 год. Мотузок до стрічы находит ся на фейсбуковым сайті Карпатского Народного Університету.

«Мій язык, моє коріня»

Окресна Бібліотека в Бардийові і Фонд на Підпору Культуры Нацийональных Меншын просят на літературно-соспільну стрічу «Мій язык, моє коріня». Подія пройде 10. листопада/новембра о 16.00 год. в будинку бібліотекы. Стріча зачне ся од выступліня співочой ґрупы з локальной ґімназиі. Пак пройде част з дискусийным панельом з запрошеныма гістми: Людмилом Шандальовом, Владиславом Сивым і Данєльом Капральовом. Дрібниці находят ся на фейсбуковым сайті Окресной Бібліотекы в Бардийові.