Сумар дня на 8. листопада/новембра 2023 р.

Приносиме вам сумар медияльной ґрупы ЛЕМ.фм+ на ден 8. листопада/новембра 2023 р.

Торжества серед Русинів на Мадярах

Русины на Мадярах просят на аж дві подіі, якы одбудут ся в найблизшу суботу. Од 11.00 год. в славній базиліці св. Штефна в Будапешті (то найвекшый храм столиці Мадяр, може помістити до 8 500 осіб) буде проходила Медженародна Стріча Грекокатолицкых Церковных Хорів, котру орґанізує Вседержавне Русиньскє Самосправованя. В проґрамі находят ся выступы семох хорів, м.ін. зо Словациі, Сербіі і домашніх. Натоміст од год. 14.30 в каштели Штефанія, тіж в Будапешті, проходити будут «Шедевры Русиньского Умільства». Промавлял буде м.ін. др Чабa Латорцаі, пaрляментарный секретар стану в Канцеляриі Презеса Рады Міністрів Мадяр. Найважнійшым пунктом подіі буде Торжественна деклярация кодифікациі мадярского вариянту русиньского літературного языка – выголосят єй др Михаіл Капраль, директор Русиснького Наукового Інституту ім. А. Годинкы та Віра Ґіріц – посланкыня Русинів в мадярскым парляменті. По деклярациі пройде презентация Мужскым Хором Святого Єфрема Літургіі св. Йоана Крестителя композитора Микловша Могаі. На закінчыня выступит ансамль Русины. Шедевры орґанізуют: посланкыня Віра Ґіріц, Вседержавне Русиньскє Самосправованя, Вседержавне Общество Русинів Мадяр, Общество Русиньской Культуры та Фундация «За Русинів».

Знаме хто выграл чытникы Kindle

Стоваришыня «Руска Бурса» в Ґорлицах оголосило результаты плястичного конкурсу для діти, в котрым задачом было плястичні зінтерпретувати Мурянкового Шковраночка і госло Лемковина. Надосланых было близко сто малюнків од учеників зо шкіл і предшколів в Баници, Снітници, Ганчовій, Высовій, Устю Рускым, Бодаках, Санковій, Ґладышові, Пшемкові і Радваницях. Были тіж працы індивідуальні присланы через родичів – і з Лемковины, і од Лемків жыючых на заході. Роботы оцінило триособове жырі в складі: Анджей Жыґадло, Давид Здобыляк та Каміля Трохановска, якы каждому рисунковы признавали окремо пункты за техніку і композицию, за зінтерпретуваня темы та «тото штоси» – субєктивне одчутя оцінюючого. Жырі – як сами ствердили – не мало легкой задачы, што было тіж видно в іх оцінах – о выграній рішыли поєдны пункты. Особы з першого місця отримуют по чытнику маркы Kindle. Результаты: – катеґория до 5 рочків: І місце – Ніна Феленчак, ІІ місце – Семан Фудаля, ІІІ місце – Матвій Кузяк; – катеґория од 6 до 9 років: І місце – Осиф Бодак, ІІ місце – Ришард Фудаля, ІІІ місце – Михал Баліньскій; – катеґория од 10 до 13 років: І місце – Татяна Чухта, ІІ місце – Ева Трухан, ІІІ місце – Юлия Баня. Сердечні ґратулюєме!

Нацийональне листопадове свято в Польковицях на спортово

Польковиці будут на спортово пережывати нацийональне листопадове свято. В суботу 11. листопада/новембра о год. 11.11 выстартує Біганя Незалежности під почестным покровительством бургомайстра Польковиц Лукаша Пузнєцкого. Записы принаманы сут інтернетово, а для найскоршых літачів заплянували нагороды – окрем памятковых медалів, кошельок, за перше місце признане буде 600 зл, за друге – 400 зл і за третє 200 зл. Ціла траса обнимат 5 км і веде улицями міста. Окрем головного бігу, пройде тіж родинне біганя з фаном на ріжных дистансах – до 100 до 400 метрів. Орґанізатором змагань є фірма ATT Sport, зас головным спонсором – Ґміна Польковиці.

Фестіваль Вельох Культур

В пятницю і суботу в Дукли одбуде ся Фестіваль Вельох Культур. Четверта едиция орґанізувана є в партнерстві з Підкарпатскым Воєвідством, орґанізатором є Бровар Дукля. В заміріню думкодавців фестівалю, подія має быти «гостином для смыслів та вказаньом культуровой і артистичной ріжнорідности, котра обєднує вшыткых». В проґрамі фестівалю сут три концерты, єден одбуде ся в пятницю, два в суботу, выступлят – одповідньо – ансамлбі Фальохрон, The Rumpled та Вадада. Фальохрон презентує получыня співаной поезиі з фрі джазом і індіе фольком, The Rumpled то кельтицкій фольк-рок, зас бубнярскій ансамбль Вадада то звукы інспіруваны ритмами Африкы, Кубы, Бразилиі і Азиі доправлены карпатскыма, але тіж авторскыма мелодиями. Фестівальови товаришыла буде выстава малюваных мандалів авторства Ґражыны Фалькєвич. В пятницю концерт одбуде ся в реставрациі Pub Browar Dukla в Дукли, зас суботні концерты пройдут в просторах самого Бровару Дукля в Церговій.