Сумар дня на 8. лютого/фебруара 2021 р.

Приносиме вам сумар медияльной ґрупы ЛЕМ.фм+ на ден 8. лютого/фебруара 2021 р.

Повселюдне Списуваня выдолжене

1. квітня/апріля 2021 р. рушат в Польщы Повселюдне Списуваня, вчас котрого буде мож окрислити свою нацийональніст і хоснуваный язык, в тым окрему лемківску нацийональніст і лемківскій язык. Згідно з рекомендациями власти час списуваня має ся выдолжыти о три місяці. Зміны мают дозволити ефективно провести списуваня в условіях емідемічного загорожыня COVID-19. Списати ся буде мож через інтернет або телефон, а коли позволит на тото епідемічна ситуация і безпосередньо. Згідно з проєктом принятым Радом Міністрів, списуваня потырват до 30. вересня/септембра тр.

Злегчыня ограничынь спричыненых пандемійом

В пятницю, 5. лютого/фебруара, одбыла ся конференция премєра ПР Матеуша Моравєцкого, тыкаюча дальшых змін в ограничынях спричыненых епідемійом коронавіруса. Од 12. лютого/фебруара одкрыты будут готелі і нічліговы місця до половины доступных місц. Так само одкрыты до 50% доступных місц будут кіна, фільгармоніі, оперы і театры, при обовязку закрывати ґамбу і ніс. Аматорскій спорт на одкрытым повітри буде можливый без ограничынь при захованю санітарного режіму. Одкрыты будут тіж лыжны стациі і басены. Злегчыня ограничынь має быти залежно од епідемічной ситуациі продолжене або одкликане по двох тыжнях од введіня.

Економічный Форум переносит ся до Карпача

Економічный Форум офіцияльно переносит ся з Крениці до Карпача. Догваріня на найблизше 6 років підписано 4. лютого/фебруара во Вроцлаві. Переносины до Карпача кінчат період 28 років функцийонуваня Форум в Креници. Конкурсова комісия Форум зобрала ся послідній раз 3. лютого/фебруара, жебы іщы раз анализувати нову креницку оферту, яка была фінально одшмарена. Як причыну орґанізаторы подали брак порозумліня з властями Крениці і не выполніня нима найважнійшых вымогів. Подля орґанізаторів Форум новы тымчасовы локализациі і орґанізацийны розвязаня рекомендуваны властями Крениці спричыняли ризико в обшыри лоґістикы, адміністрациі і безпекы.

Юрий Стариньскій в Социяльній Раді Культуры

В січни/януарі маршалок нижньошлезского воєвідства Цезарий Пшыбыльскій покликал Социяльну Раду Культуры. Рада являт ся опінійодавчо-дорадчым і консультацийным орґаном діючым при маршалку Нижнього Шлеска. Цілю спілпрацы воєвідского самоуряду і членів Социяльоной Рады Культуры буде выпрацувати добрый і ефективный модель спілпрацы інституций культуры, творчых середовиск, незалежных творців і інчых підметів діючых для культуры на Нижнім Шлеску. До творіня Рады прошеных было сімнацетеро представників творчых середовиск, артистів, аніматорів, експертів в обшыри культуры, представників нижньошлезскых інституций культуры і позаурядовых орґанізаций діючых в тій обшыри. Ліґницю в Раді репрезентувал буде Юрий Стариньскій – аніматор культуры, історик, хореоґраф, директор Медженародного Фольклорного Фестівалю «Світ під Кычером», основатель Ансамблю Пісні і Танця «Кычера».

Одкрытя Рады Безпекы Дорогового Руху в ґорлицкым повіті

В четвер, 4. лютого/фебруара, в Повітовым Старостві в Ґорлицях прошла орґанізацийна стріча, тыкаюча одкрытя в ґорлицкым повіті Рады Безпекы Дорогового Руху. Была она зорґанізувана в одповіди на внесок Віцемаршалка Лукаша Смулкы, тыкаючый покликаня рад безпекы дорогового руху в Малопольщы. На стрічы омовлено м.ін. ціли Повітовой Рады, примірово ініциюваня діянь для поправы безпекы дорогового руху, окрисліня і координувяня напрямів в діянях ґмінных самоурядів і повітовых служб в справах безпекы дорогового руху, як тіж промуваня культуры в дороговым руху на обшыри ґорлицкого повіту. Подля Мариі Ґубалы, старосткы ґорлицкого повіту, діяня Рады влинут на звекшыня рівня безпекы на дорогах в повіті.