Сумар дня на 8. лютого/фебруара 2023 р.

Приносиме вам сумар медияльной ґрупы ЛЕМ.фм+ на ден 8. лютого/фебруара 2023 р.

Грекокатоликы перешли на новый календар

Єпархіі грекокатолоцкой Церкви в Польщы: перемышльско-варшавска, вроцлавско-кошаліньска і ольштыньско-ґданьска, як і грекокатолицка Церков на Украіні резиґнуют з хоснуваня юлияньского календаря. Зміны войдут в жытя 1. вересня/септембра, значыт з початком нового літургічного рока. То рішныня остатнього Архієрейского Собору УГКЦ, якє было подане до публичной відомости 6. лютого/фебруара. 93. сесия Архієрейского Синоду УГКЦ на Украіні проходила 1.-2. лютого/фебруара во Львові-Брюховичах. За тым пішли і грекокатолицкы владыкы в Польщы, якы декретом з дня 6. лютого/фебруара 2023 р. рішыли, што вшыткы грекокатоликы в Польщы од тепер будут святкувати нерухомы свята за новым календарьом. В офіцийным документі підкрислено, што зміна календаря тыкат нерухомых свят, а Пасха і повязаны з ньом праздникы будут святкуваны за старым стилом. Більше на тоту тему чытайте на нашым портали.

Православны духовны одзначены Президентом ПР

Президент ПР Анджей Дуда надал державны одзначыня духовным і світскым особам заанґажуваным в діяльніст Польской Автокефальной Православной Церкви. Серед выріжненых діючых для потрібуючых помочы і підпоры нашли ся головні тоты звязаны з діяльністю Православного Осередка Милосердя ЕЛЕОС і особы активно заанґажуваны в поміч пошкодуваным в результаті росийской аґресиі на Украіну. В імени Президента 3. лютого/фебруара в Президентскым Палаци в Варшаві одзначыня передал Секретар Стану в Канцеляриі Президента ПР Войцєх Колярскій. Золотый Крест Заслугы отримали о. Артур Ґрабан і Марек Масальскій, а Бронзовый Крест Заслугы м.ін. о. Юлиян Феленчак і о. Юрий Мокрауз. На закінчыня подіі одзначены попросили передати Президентови ПР іконы Христа Спаса.

Новы дороговы інвестициі в Малопольщы і на Підкарпатю

Сут уж результаты набору в рамках Урядового Фонду Розвитку Доріг для підкарпатского і малопольского воєвідств. 181 млн зл – то дальшы урядовы середкы, якы трафлят на Підкарпатя. Завдякы дофінансуваню зреализуваных буде 106 задач. То аж 185 км новых і выремонтуваных доріг в тым реґіоні. Малопольща отримат близко 192 млн зл на 125 задач і в рамках дофінансуваня выремонтуваныцх або выбудуваных буде близко 220 км доріг. Урядовы середкы, якы реґулярно трафляют до малопольскых і підкарпатскых самоурядів, дозвяляют на розвиток безпечной і модерной дороговой інфраструктуры.

«Одкрывця Нацийональных Парків»

Міністерство Климату і Середовиска выдало мультімедияльну гру «Одкрывця Нацийональных Парків». Дозвалят она віртуальні одвиджати паркы з цілой Польщы. В грі находит ся провідник з інформацийями о даным парку і атляс зо звірятами і рослинами, котры можна в ним найти. «Одкрывця Нацийональных Парків» дає можливіст завдякы выполняню конкретных задач пошыряти знаня на тему охороны природы. Сут тіж додатковы задачы, котры робит ся безпосередньо в парку.